საქართველოს უზენაესი მოსამართლეობის კანდიდატს, თამარ ალანიას ჰგონია, რომ 2012 წლამდე, წინა ხელისუფლების დროს სასამართლო თავისუფალი იყო. ამის შესახებ მან იურიდიულ საკითხთა კომიტეტში პარლამენტის დეპუტატის, ეკა ბესელიას კითხვაზე პასუხის გაცემის დროს განაცხადა.

"ცხადია, იყო დამოუკიდებელი. უბრალოდ, ხარისხზე შეგვიძლია ვისაუბროთ", — თქვა ალანიამ.

2012 წლამდე სასამართლო ხელისუფლების ზეწოლაზე თანხმდებიან როგორც მოქმედი ხელისუფლების, ისე წინა ხელისუფლების წარმომადგენლები. თუმცა მაშინდელმა მოსამართლემ, რომელიც ახლაც მოსამართლედ მუშაობს და უზენაეს სასამართლოში უვადოდ დანიშვნა სურს, განსხვავებული პოზიცია აქვს.

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.