პარკინსონი პროგრესული დაავადებაა, რომელიც უშუალო გავლენას ახდენს ტვინსა და ნერვულ სისტემაზე. ამჟამად მისი განკურნება შეუძლებელია — ბაზარზე არსებული მედიკამენტები მხოლოდ სიმპტომების სამკურნალოდ გამოიყენება.

მედიკამენტი ტერაზოსინი პროსტატის კეთილთვისებიანი ჰიპერპლაზიის დროს შარდის ბუშტის კუნთებისა და თავად ჯირკვლის მოსადუნებლად გამოიყენება. ეს საშუალება ასევე ააქტიურებს ფერმენტ PGK1-ს, რომელიც მნიშვნელოვან როლს თამაშობს ტვინის ნერვული უჯრედების დაცვაში. სწორედ ეს აქცევს ამ პრეპარატს პარკინსონის საწინააღმდეგო საშუალებად.

მკვლევარებმა პარკინსონითა და პროსტატის კეთილთვისებიანი ჰიპერპლაზიით დაავადებული 2 880 ადამიანი გამოიკვლიეს. მათ სამკურნალოდ ტერაზოსინს, ან ფერმენტ PGK1-ზე მოქმედ პრეპარატს აძლევდნენ. თერაპიის შედეგები 15 409 ადამიანის მკურნალობის შედეგებს შეადარეს — აღნიშნული პაციენტები ისეთი მედიკამენტებით მკურნალობდნენ, რომლებიც გავლენას არ ახდენდნენ ფერმენტ PGK1-ზე. აღმოჩნდა, რომ ტერაზოსინით მკურნალობამ პარკინსონის განვითარების სიჩქარეზეც მოახდინა გავლენა — დაავადების სიმპტომების გამოვლენა შენელდა.

კვლევის ავტორთა აზრით სიხარული ჯერ ნაადრევია, რადგანაც ეს არ ნიშნავს, რომ პარკინსონის დაავადების განმაკურნებელი წამალი უკვე ნაპოვნია. ეს აღმოჩენა მეცნიერებს შემდგომი კვლევების კონკრეტულ მიმართულებაზე მიუთითებს.

კვლევა Journal of Clinical Investigation-ში გამოქვეყნდა.