NDI-ის კვლევის მიხედვით, გამოკითხულთა 70 პროცენტი ამბობს, რომ საქართველოს ეკონომიკა სარგებელს მხოლოდ ადამიანების გარკვეულ ჯგუფს აძლევს. მხოლოდ 12 პროცენტი ფიქრობს, რომ ეკონომიკური სარგებელი თანასწორად ნაწილდება.

ფოტო: NDI

მოსახლეობის 63 პროცენტი ქვეყნის ამჟამინდელ ეკონომიკურ მდგომარეობას ცუდად აფასებს, 31 პროცენტი საშუალოდ, ხოლო 4 პროცენტი კარგად.

ფოტო: NDI

მოსახლეობის 76 პროცენტის აზრით, მთავრობა სრულად არის პასუხისმგებელი ქვეყანაში ეკონომიკურ მდგომარეობაზე.

ამავე კვლევით, მთავარი ეროვნული საკითხები ეკონომიკას უკავშირდება: სამუშაო ადგილები, ფასების ზრდა და ინფლაცია, სიღარიბე.

მოსახლეობის მხოლოდ მესამედი ფიქრობს, რომ მათი მშობლების თაობასთან შედარებით უკეთ ცხოვრობს; მოსახლეობის თითქმის ნახევარი ამბობს, რომ ამჟამად იმაზე ნაკლები ფინანსური შესაძლებლობა აქვს, ვიდრე 5 წლის წინ ჰქონდა;

ფოტო: NDI

მოსახლეობის ნახევარმა აღნიშნა, რომ ბოლო 6 თვეში ჰქონია შემთხვევა, როდესაც უსახსრობის გამო კომუნალური გადასახადების დაფარვა ვერ მოახერხა. მათივე თქმით, მოულოდნელი საჭიროების შემთხვევაში 300 ლარის უპროცენტოდ სესხებას ვერ მოახერხებდა (54 პროცენტი). ეროვნულ დონეზე მოსახლეობის მხოლოდ 10 პროცენტი ამბობს, რომ დანაზოგი აქვს. დანაზოგის ქონის მაჩვენებელი ყველაზე მაღალი უმცირესობათა დასახლებებშია (24 პროცენტი).

აღნიშნული კვლევა, 2019 წლის 13-29 ივლისის პერიოდში, საქართველოს მასშტაბით 2 131 პირისპირი ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარი არის +/- 1.7 პროცენტი.