"ეუთოს სადამკვირვებლო მისია საგულდაგულოდ აკვირდება ჩორჩანა-წნელისის მიდამოებში საოკუპაციო ხაზთან მიმდინარე მოვლენებს", — ნათქვამია განცხადებაში, რომელიც სადამკვირვებლო მისიამ გაავრცელა. მათივე ცნობით, მისიის წარმომადგენლები 24 აგვისტოდან მუდმივად იმყოფებიან ადგილზე და მაღალი საზოგადოებრივი ინტერესიდან გამომდინარე დამატებით ინფორმაციას ავრცელებს:

"2019 წლის იანვრის დასაწყისში სადამკვირვებლო მისიამ შეამჩნია ხეზე ფერადი მონიშვნები წნელისსა და ჩორჩანას მიდამოებში. დამკვირვებლებმა ეს შეაფასეს, როგორც ბორდერიზაციის ნიშანი. თუმცა, ამ მონიშვნებზე პასუხისმგებლობა არავინ აიღო. 20 აგვისტოდან 24 აგვისტომდე პერიოდში სოფელ წნელისის განაპირას ქართული საგუშაგო აიგო სახელმწიფო უსაფრთხოების სამსახურის სპეციალურ დავალებათა დეპარტამენტის მიერ. ეუთოს სადამკვირვებლო მისიის ცნობით, საგუშაგო მდებარეობს საოკუპაციო ხაზიდან 240 მეტრში, საქართველოს კონტროლირებად ტერიტორიაზე", — ვკითხულობთ განცხადებაში.

მათივე ცნობით, სამხრეთ ოსეთის უსაფრთხოების სამსახურის წარმომადგენლებმა გასულ კვირას ახალი პოზიციები დაადგინეს და ბორდერიზაციის ამსახველი რამდენიმე ნიშანი დაამონტაჟეს, მათ შორის მწვანე ნიშნულები და დროშა საოკუპაციო ხაზს მიღმა. მისიის ცნობით, დე ფაქტო სამხრეთ ოსეთი წარმომადგენლებმა ნიშნულები საოკუპაციო ხაზს მიღმა 1 300 მეტრში დაამონტაჟეს. ამის პარალელურად, საქართველოს გააძლიერა თავისი შეიარაღებული წარმომადგენლობა ჩორჩანას ტყეში.

მისია ყურადღებას ამახვილებს შეიარაღებული დაცვის წარმომადგენლების გაძლიერებაზე ჩორჩაა-წნელისის ტერიტორიაზე: "საოკუპაციო ხაზის გასწვრივ ახალი პოზიციების მონიშვნა და შეიარაღებული პირები თავმოყრა ზრდის შეტაკების პოტენციალს და საფრთხეს უქმნის სტაბილურობას".

განცხადებაში საუბარია იმ ტექნიკურ შეხვედრებზე, რომელიც მხარეებს შორის გაიმართა. ბოლო შეხვედრა 13 სექტემბერს გაიმართა, ერგნეთში. მისიის ცნობით, შეხვედრა პროფესიონალურ ატმოსფეროში წარიმართა, თუმცა მხარეებმა პოზიციები ვერ შეაჯერეს.

"პოზიტივია, რომ შეხვედრის ყველა მონაწილე შეთანხმდა ძირითად პრინციპზე, რომ ჩორჩანა-წნელისის მიდამოებში მოსალოდნელ ესკალაციას თავიდან აიცილებენ",— ნათქვამია განცხადებაში.

მისია ასევე საუბრობს ორ გამშვებ პუნქტზე ოძისსა და სინაგურში, რომელიც 4 სექტემბრიდან დაკეტილია. უცნობია, როდის აპირებს დე ფაქტო სამხრეთ ოსეთი გამშვები პუნქტების გახსნას.

"ეუთოს სადამკვირვებლო მისია განიხილავს გამშვები პუნქტების ჩაკეტვას, როგორც გადაადგილების შეზღუდვას, რომელიც ნეგატიურ გავლენას ახდენს საოკუპაციო ხაზის ერთ ან მეორე მხარეს მცხოვრებლებზე", — ვკითხულობთ განცხადებაში.