"ანა დოლიძემ არ ისურვა შვებულების შეწყვეტა და არ მოცდა დასვენებას", — ასე უპასუხა იუსტიციის უმაღლესი საბჭოს წევრმა დიმიტრი გვირიტიშვილმა ჟურნალისტის კითხვას იმაზე, რომ საბჭოს არამოსამართლე წევრი ვერ ესწრება მოსამართლეთა ასარჩევ კენჭისყრას. გვრიტიშვილი ანა დოლიძეს ადანაშაულებს იმაში, რომ კენჭისყრაში მონაწილეობის მისაღებად შვებულება არ შეწყვიტა:

"მე და ჩემს კოლეგებს, მოსამართლე წევრებს ვგულისხმობ, არაერთხელ გაგვიკეთებია განცხადება, რომ ანა დოლიძე არაჯეროვნად ასრულებს თავის სამსახურეობრივ უფლება-მოვალეობას, რის გამოც იგი არ იმსახურებს იუსტიციის უმაღლესი საბჭოს წევრის მაღალ სტატუსს".

იუსტიციის უმაღლესი საბჭოს არამოსამართლე წევრი, ანა დოლიძე ფეისბუქზე ეხმაურება უზენაესი სასამართლოს მოსამართლეთა შესარჩევ კენჭისყრას და ამბობს, რომ ამ ფაქტზე მას და ნაზი ჯანეზაშვილს ერთი დღით ადრე შეატყობინეს:

"მთელი აგვისტო მე და ნაზი ვითხოვდით კენჭისყრის თარიღის დადგენას, რაც არ გვეღირსა. ახლა ერთი დღით ადრე გვეცნობა კენჭისყრის დღე, სწორედ ამიტომ. გახარიას დანიშვნას მიაქვს საზოგდოებრივი ყურადღება და იმედია, რომ ამიტომ მოსამართლეების საკითხს ყურადღებას ნაკლებად მიაქცევენ. ეს კარგიც არის, ანუ არსებობს ხალხის რეაქციის შიში. მე საქართველოში არ ვიმყოფები და კენჭისყრას ვერ ვესწრები. თუმცა ამ ფარსში მონაწილეობას აზრი აქვს მხოლოდ იმისთვის, რომ პროცესის სიმახინჯეს გაესვას ხაზი".

ანა დოლიძის შეფასებით, უზენაესი სასამართლოს მოსამართლეების არჩევა იუსტიციის საბჭოს მიერ თავიდან ბოლომდე ფასადური პროცესია:

"ის პოლიტიკურად მართული პროცესია. ამის კიდევ ერთი დასტური არის კენჭისყრის დანიშვნა სამთავრობო ცვლილებების პარალელურად".

იუსტიციის უმაღლეს საბჭოში მოსამართლეთა შერჩევის პროცედურა მიმდინარეობს. ფარული კენჭისყრით უზენაესის სასამართლოს მოსამართლეობის 48 კანდიდატიდან საბჭო 20 მათგანს შეარჩევს. კენჭისყრის მეორე ეტაპზე სათითაოდ ეყრება კენჭი შერჩეულ 20 კანდიდატს, იმის გასარკვევად, უნდა წარედგინოს თუ არა მისი კანდიდატურა საქართველოს პარლამენტს.