მედიის ადვოკატირების კოალიცია რუსთავი 2-ში საკადრო ცვლილებებს ეხმაურება და აცხადებს, რომ საფრთხეების მოლოდინი, რომელზეც ტელეკომპანიის თანამშრომლები ხელმძღვანელობის შეცვლის შემდეგ საუბრობდნენ, გამართლდა.

"ტელეკომპანიის თანამშრომლები დირექტორის შეცვლის შემდგომ საუბრობდნენ იმ საფრთხეებზე, რომლებიც შესაძლოა სარედაქციო დამოუკიდებლობისა და შრომითი უფლებების თვალსაზრისით შექმნოდათ. დღეს კი ეს მოლოდინი გამართლდა. ამასთან, აღსანიშნავია ის გარემოებაც, რომ საჯარო რეესტრში 2019 წლის 16 აგვისტოს დარეგისტრირდა განცხადება რუსთავი 2-ში პროფესიული კავშირების შექმნის თაობაზე, რომლის ერთ-ერთ დირექტორადაც არხის საინფორმაციო სამსახურის ყოფილი უფროსი ნოდარ მელაძე იყო მითითებული", — ნათქვამია კოალიციის განცხადებაში.

ამასთანავე, განცხადებაში ვკითხულობთ, რომ მნიშვნელოვანია, არ მოხდეს ჟურნალისტების სარედაქციო საქმიანობაში ან შემოქმედებით პროცესში ჩარევა და ცენზურა. აუცილებლად უნდა იქნას დაცული ჟურნალისტთა შრომითი უფლებები. კოალიციაში შემავალი ორგანიზაციები დააკვირდებიან რუსთავი 2-ში განვითარებულ მოვლენებს და, საჭიროების შემთხვევაში, ჟურნალისტების შრომით უფლებებს დაიცავენ

განცხადებას ხელს 11 არასამთავრობო ორგანიზაცია აწერს:

  • საქართველოს ახალგაზრდა იურისტთა ასოციაცია;
  • მედიაკლუბი;
  • საქართველოს ჟურნალისტური ეთიკის ქარტია;
  • ინფორმაციის თავისუფლების განვითარების ინსტიტუტი;
  • ღია საზოგადოების ფონდი;
  • რეგიონულ მაუწყებელთა ალიანსი;
  • ლიბერალური აკადემია თბილისი;
  • საქართველოს რეგიონული მედიის ასოციაცია;
  • სატელევიზიო ქსელი;
  • საქართველოს მცირე და საშუალო სატელეკომუნიკაციო ოპერატორთა ასოციაცია;
  • საქართველოს დემოკრატიული ინიციატივა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

გაიგეთ მეტი ჟურნალისტების გათავისუფლების მიზეზებზე: