საქართველოს კონკურენციის სააგენტო, ეროვნული ვალუტის კურსის ცვლილებასთან დაკავშირებით, სადისტრიბუციო, რიგი მწარმოებელი კომპანიებისა და ასოციაციების წარმომადგენელთა მხრიდან საინფორმაციო საშუალებებში, ფასების შესაძლო მატებასთან დაკავშირებით გავრცელებული განცხადებებით დაინტერესდა. ამის შესახებ განცხადება კონკურენციის სააგენტომ გაავრცელა.

მათი ცნობით, საჯარო განცხადებაში დაფიქსირებული ფაქტები, შესაძლოა, კომპანიებს შორის კოორდინაციისა და ,"კონკურენციის შესახებ" საქართველოს კანონის დარღვევის რისკებს შეიცავდეს.

"საქართველოს კონკურენციის სააგენტომ ინფორმაციის მოწოდება და, ხსენებულ საკითხებთან დაკავშირებით, შესაბამისი განმარტება მოითხოვა: საქართველოს დისტრიბუტორთა ბიზნეს ასოციაციისგან; შპს "დიპლომატ ჰოლდინგისგან"; საქართველოს ხორბლის და ფქვილის მწარმოებელთა ასოციაციისგან; მეფრინველეობის განვითარების ასოციაციისგან", — ვკითხულობთ განცხადებაში.

საქართველოს კონკურენციის სააგენტო განმარტავს, რომ კონკურენციის შესახებ საქართველოს კანონის მე-7 მუხლის შესაბამისად, აკრძალულია ეკონომიკურ აგენტებს შორის დაიდოს ისეთი შეთანხმება, რომლის მიზანია ან რომლის შედეგია შესაბამის ბაზარზე კონკურენციის შეზღუდვა, დაუშვებლობა ან/და აკრძალვა. აღნიშნული შეთანხმების ერთ-ერთ სახეს ეკონომიკურ აგენტებს შორის ფასებზე ან სხვა სავაჭრო პირობებზე შეთანხმება წარმოადგენს.

პირველი აგვისტოს გაცვლითი კურსით, ლარი ევროსთან და დოლართან მიმართებით რეკორდულად გაუფასურდა და 2,9718 ლარი გახდა. მიმდინარე კვირის ბოლოს შედარებით გამყარდა და ერთი დოლარის ღირებულება 2,8870 ლარია

კონკურენციის სააგენტო 7 თვეზე მეტია სწავლობს, რის გამო გაძვირდა პური 2018 წლის დეკემბერში.