ჩვენს გალაქტიკაში არსებული ყველაზე კაშკაშა ვარსკვლავების ანალიზით დადგინდა, რომ ისინი, პოპულარული შეხედულების მიუხედავად, ერთ სიბრტყეზე განლაგებულები არ არიან. როგორც ირკვევა, ჩვენი გალაქტიკის ბოლოები არა ბრტყელი, არამედ აპრეხილია.

ვარშავის უნივერსიტეტის ასტრონომების ვარაუდით, ეს, შესაძლოა, წარსულში სხვა გალაქტიკებთან ურთიერთქმედების შედეგი იყოს.

გუნდის მიერ შექმნილი ახალი რუკები ჟურნალ Science-ში გამოქვეყნდა.

პოპულარული წარმოდგენა, რომ ირმის ნახტომი ბრტყელ დისკოს წარმოადგენს, შეზღუდულ ინფორმაციაზე დაყრდნობითაა შექმნილი. ეს ჩვენი გალაქტიკის მხოლოდ მიახლოებითი ფორმაა.

"ირმის ნახტომის შიდა სტრუქტურა და მისი ისტორია დიდწილად ისევ ამოუხსნელია. ამის ერთ-ერთი მიზეზი ისაა, რომ ჩვენი გალაქტიკის გარეუბნებში არსებულ ვარსკვლავებზე დაკვირვება და მათ შორის მანძილების განსაზღვრა განსაკუთრებით რთულია", — აცხადებს ვარშავის უნივერსიტეტის პროფესორი დოროტა სკოვრონი.

ირმის ნახტომის უფრო ზუსტი სურათის შესაქმნელად სკოვრონმა კოლეგებთან ერთად დედამიწიდან ჩვენს გალაქტიკაში არსებულ ყველაზე კაშკაშა ვარსკვლავებამდე არსებული მანძილები გამოთვალა. ასეთ ვარსკვლავებს ცეფეიდები ეწოდებათ და მათ მიერ გამოყოფილი ენერგია ჩვენი მზისას რამდენიმე ასეულჯერ, ზოგჯერ კი რამდენიმე ათასჯერაც აღემატება. ეს სიკაშკაშე კი ასტრონომებს მათ შესწავლას უადვილებს, თუნდაც ისინი ჩვენი გალაქტიკის კიდეზე იმყოფებოდნენ.

"ჩვენი შედეგები მიუთითებს, რომ ირმის ნახტომი ბრტყელი არ არის. მისი კიდეები ერთ მხარეს ზემოთაა აპრეხილი, მეორე მხარეს კი — პირიქით", — ნათქვამია კვლევაში.

პოლონელი მეცნიერების მიერ მიღებული შედეგები ჩინელი და ავსტრალიელი მეცნიერების მიერ თებერვალში ჟურნალ Nature-ში გამოქვეყნებულ კვლევასთანაც თანხვედრაშია, რომელიც სწორედ ცეფეიდებს ეხებოდა.