იუსტიციის უმაღლეს საბჭოში უზენაესი სასამართლოს მოსამართლეობის კანდიდატთან, იუსტიციის უმაღლესი საბჭოს მოქმედ მდივანთან, გიორგი მიქაუტაძესთან გასაუბრება მიმდინარეობს.

მან გასაუბრების დაწყებამდე მედიასთან განაცხადა, რომ დადებითი განწყობა აქვს და ერთ-ერთი დიდი გამოწვევაა მის კარიერაში.

არასამთავრობო სექტორი და იუსტიციის საბჭოს არამოსამართლე წევრები გიორგი მიქაუტაძის კანდიდატურას ამ დრომდე აკრიტიკებენ. ისინი მიქაუტაძეს ე.წ. ჩინჩალაძე-მურუსიძის კლანის წევრად მოიხსენიებენ და მოსამართლეების შერჩევის პროცესში ინტერესთა კონფლიქტზე საუბრობენ.

იუსტიციის უმაღლესი საბჭოს არამოსამართლე წევრები ნაზი ჯანეზაშვილი და ანა დოლიძე აცხადებენ, რომ გიორგი მიქაუტაძის უზენაესი სასამართლოს მოსამართლეობის კანდიდატად ყოფნა დაუშვებელია. მათ საგანგებო პრესკონფერენცია გამართეს, სადაც განაცხადეს, რომ მიქაუტაძის მოსამართლეების კონკურსში მონაწილეობით ჩრდილი ადგება იმ პროცესს, რომელიც ჩვენი ქვეყნის მართლმსაჯულების სისტემისთვის ისტორიული მნიშვნელობისაა.

არამოსამართლე წევრებმა ყურადღება გაამახვილეს მათივე თქმით, დარღვევეზე, რომელიც გიორგი მიქაუტაძის კონკურსში მონაწილეობას უკავშირდება:

მიქაუტაძე, როგორც იუსტიციის უმაღლესი საბჭოს მდივანი, კვლავ ინარჩუნებს იუსტიციის საბჭოს აპარატის მოქმედი ხელმძღვანელის სტატუსს;
მათივე ცნობით, 2019 წლის 7 ივნისს გიორგი მიქაუტაძემ განაცხადა, რომ იგი მონაწილეობას ვერ მიიღებდა უზენაესი სასამართლოს კანდიდატების შერჩევის შესახებ საკითხების განხილვაში, რადგან თავად არის კონკურსის ერთ-ერთი მონაწილე, თუმცა იგი კვლავ რჩება იუსტიციის უმაღლესი საბჭოს მდივნად და კანონის შესაბამისად, იუსტიციის უმაღლესი საბჭოს აპარატის ხელმძღვანელიცაა.

გიორგი მიქაუტაძის გასაუბრება

იუსტიციის უმაღლეს საბჭოში უზენაესის მოსამართლეობსი 50 კანდიდატთან გასაუბრებები მიმდინარეობს, რომლის დასრულების შემდეგაც საბჭომ პარლამენტს 18 მოსამართლეობის კანდიდატი უნდა წარუდგინოს. პროცედურულად, პარლამენტმა სამუშაო ჯგუფში თითოეული კანდიდატი უნდა განიხილოს, ჩაატაროს გასაუბრება და შემდეგ, პარლამენტის პლენარულ სხდომაზე თითოეულ მათგანს კენჭი უყაროს.