რუსეთში, კერძოდ ციმბირში მილიონობით ჰექტარი ტყე იწვის. კრასნოიარსკის მხარის გუბერნატორმა, ალექსი უსმა კი განმარტა, რატომ არ აქრობენ და საერთოდ რატომ არ უნდა ჩააქრონ ხანძარი.

"თუ ზამთარში ცივი ამინდია და ქარბუქია, არავის მოსდის თავში, რომ დაადნონ აისბერგები, რათა დათბეს... ეს ჩვეულებრივი ბუნებრივი მოვლენაა, რომელთანაც ბრძოლა უაზრობაა და სადღაც, ალბათ, მავნეც კი", — აღნიშნა გუბერნატორმა.

უსის თქმით, ტყეების ტერიტორია კონტროლის რამდენიმე ზონად იყოფა. მისივე განმარტებით, ახლანდელი ხანძრები ადამიანის სიცოცხლისთვის საშიში არაა. ამავე დროს, კრასნოიარსკის მხარეში დაკვამლიანებაა, რაც გუბერნატორმა "არასასურველი ამინდით", კერძოდ კი ჩრდილოეთის ქარით გაამართლა.

გავრცელებული ინფორმაციით, ციმბირში დამწვარი ტყის ფართობმა უკვე 3 მილიონ ჰექტარს მიაღწია. ხანძრის გამო საგანგებო სიტუაცია მხოლოდ სამ მხარეშია გამოცხადებული: კრასნოიარსკი, ირკუტსკი და ნაწილობრივ ბურიატიაში. შედარებით რთული მდგომარეობაა კრასნოიარსკისა და ირკუტსკის მხარეებში. მოსახლეობა გაზრდილ დაკვამლიანებაზე ჩივის.

უკვე შექმნილია ონლაინპეტიცია, რომლითაც მოქალაქეები ხელისუფლებისგან ხანძრის კერების ჩაქრობას ითხოვენ. პეტიციას 669 ათასზე მეტი ადამიანი აწერს ხელს.