საერთაშორისო გამჭვირვალეობა საქართველოს ცნობით, სენაკის მერის, ვახტანგ გადელიას ბიძის, დემურ გადელიას კომპანიამ ვახტანგ გადელიას მერად არჩევის შემდეგ, სენაკის მერიისგან 32 248 784 ლარის ღირებულების 17 ტენდერი მოიგო.

აქედან 14 ტენდერში კომპანიას საერთოდ არ ჰყოლია კონკურენტი, ხოლო 3 შემთხვევაში მისი ერთადერთი კონკურენტი შპს "ინდიკო" იყო, რომლის მფლობელიც მერის ბიძაშვილი, იოსებ გადელიაა.

რაც შეეხება შპს "ინდიკოს", გადელიას მერად არჩევის შემდეგ, კომპანიამ 5 845 170 ლარის ღირებულების 3 ტენდერში გაიმარჯვა.

ორგანიზაციის განცხადებაში ვკითხულობთ, რომ სახელმწიფო უსაფრთხოების სამსახურის ანტიკორუფციულმა სააგენტოს ამ ფაქტთან დაკავშირებით არაერთხელ მიმართეს, მაგრამ მათ კორუფციის ნიშნები ვერ აღმოაჩინეს.

"აღსანიშნავია, რომ ვახტანგ გადელია წარსულში თავადაც იყო სს "არქეოპოლისის" სამეთვალყურეო საბჭოს წევრი, ხოლო მისი მოადგილე, ნანა ზარანდია, ამ კომპანიის დირექტორის პოზიციას იკავებდა.

ამ კავშირებზე წარსულშიც არაერთხელ დავწერეთ, თუმცა სახელმწიფო უსაფრთხოების სამსახურის ანტიკორუფციულმა სააგენტომ ვერ (ან არ) აღმოაჩინა მასში კორუფციის შესაძლო ნიშნები.

სწორედ ზემოაღნიშნული კავშირები, კონკურენციის ფაქტობრივი არარსებობა და ხშირ შემთხვევაში კონკრეტულ კომპანიაზე მორგებული სატენდერო პირობები აჩენს კითხვებს კორუფციასთან, შესყიდვების სამართლიანობასა და გამჭვირვალობასთან დაკავშირებით. სენაკის მერიის ტენდერები წარმოაჩენს სისტემურ პრობლემებს, რაც მიუკერძოებელ და ობიექტურ გამოძიებას საჭიროებს," — ვკითხულობთ გავრცელებულ ინფორმაციაში.

ასევე იხილეთ: