თბილისის საქალაქო სასამართლოში ბადრი ჯაფარიძის სასამართლო სხდომის დაწყებამდე, ადვოკატმა ზვიად კორძაძემ განაცხადა, რომ ამ საქმეზე სისხლს სამართლის დევნა უნდა შეწყდეს.

"ამ საქმეზე სისხლს სამართლის დევნა უნდა შეწყდეს მარტივი მიზეზის გამო. იმიტომ, რომ მუხლი რომლითაც წაყენებული აქვთ ბრალი მამუკასა და ბადრისაც ეს არის კომისიის კანონიერი გადაწყვეტილების შეუსრულებლობა. დებულებაშიც, პარლამენტის რეგლამენტშიც ძალიან კონკრეტულად არის განსაზღვრული, რომ კომისია გადაწყვეტილებას იღებს ოქმის ფორმით, რომელსაც ხელს აწერს თავმჯდომარე და მდივანი. ასეთი გადაწყვეტილება არ არსებობს ბუნებაში. არსებობს მხოლოდ ქალბატონი თეა წულუკიანის წერილი, რომელიც ვერ ჩაითვლება გადაწყვეტილებად. შესაბამისად არ არსებობს საფუძველი, რომლის მიხედვითაც მიმდინარეობს სისხლის სამართლის დევნა", — თქვა ადვოკატმა.

პროცესის დაწყებამდე ბადრი ჯაფარიძემ ჟურნალისტებთან განაცხადა, რომ “ეს პოლიტიკური დევნის გაგრძელებაა იმიტომ, რომ კომისია, სადაც არმისვლის გამო სისხლის სამართლის საქმე აღძრეს ჩემსა და მამუკას წინააღმდეგ, პოლიტიკური ანგარიშსწორებისთვისაა შექმნილი”.

"ეს არის პოლიტიკური დევნის გაგრძელება იმიტომ, რომ კომისიამ, სადაც არმისვლის გამო სისხლის სამართლის საქმე აღძრეს ჩემსა და მამუკას წინააღმდეგ, ის კომისია არის კანონის სრული დარღვევით შექმნილი, პრაქტიკულად არ არსებობს. ის არის პოლიტიკური ანგარიშსწორებისთვის შექმნილი. შესაბამისად, ეს არის პოლიტიკური დევნის გაგრძელება, რომელიც მიმდინარეობს 5 წელია.

ჩვენ უნდა გვესმოდეს, რომ კანონი განსაზღვრავს, ორაზროვნების გარეშე, რომ 50% საგამოძიებო კომისიის უნდა იყოს ოპოზიციის წევრებისგან. დაგვისახელეთ ერთი წევრი ოპოზიციიდან, შესაბამისად ეს არის სიყალბე. ეს არის პოლიტიკური თაღლითობის მკაფიო გამოხატულება", — თქვა ბადრი ჯაფარიძემ.

ბადრი ჯაფარიძეს ბრალი სისხლის სამართლის კოდექსის 349-ე მუხლით აქვს წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. მას სასამართლომ აღკვეთის ღონისძიების სახით 50 000-ლარიანი გირაო შეუფარდა, რაც ჯაფარიძემ გადაიხადა.