სავალდებულო ვაქცინაციის შესახებ კანონის შემოღებამ საფრანგეთსა და იტალიაში აცრების მაჩვენებელი გაზარდა — აღნიშნულის შესახებ ინფორმაცია გამოქვეყნდა ევროპის დაავადებათა კონტროლისა და პრევენციის ცენტრის ჟურნალში, Eurosurveillance.

ორივე ქვეყანაში ბავშვების აცრა დიფტერიაზე, ტეტანუსზე და პოლიომიელიტზე სავალდებულოა. იტალიაში ასევე სავალდებულო გახდა B ჰეპატიტის საწინააღმდეგო აცრაც.

რა სიტუაციაა საფრანგეთში?

2018 წლამდე საფრანგეთში მხოლოდ 3 დაავადების (დიფთერია, ტეტანუსი, პოლიომიელიტი) საწინააღმდეგო აცრა იყო სავალდებულო. ვაქცინაციის პოლიტიკის შეცვლის შემდეგ სავალდებულო გახდა 11 ინფექციის (დიფთერია, ტეტანუსი, პოლიომიელიტი, ყივანახველა, წითელა, წითურა, ყბაყურა, B ჰეპატიტი, ჰემოფილუს ინფლუენცა ტიპი b, პნევმოკოკი და მენინგოკოგი) საწინააღმდეგო აცრა

მონაცემთა ანალიზმა აჩვენა, რომ კანონის ამოქმედების შემდგომ 2018 წლის პირველ 5 თვეში აცრილი ბავშვების რიცხვი მნიშვნელოვნად აღემატებოდა წინა წლების იგივე პერიოდში აცრილი ბავშვების რიცხვს.

მაგალითისათვის: მენინგოკოკის საწინააღმდეგო პირველი აცრა გაიკეთა ბავშვების 36%-მა. ამის ფონზე მენინგიტით ავადობის მაჩვენებელი მნიშვნელოვნად შემცირდა: 2012-16 წლებში ყოველწლიურად საშუალოდ მენინგიტის 17 შემთხვევა ფიქსირდებოდა. ეს მაჩვენებელი 2018 წელს წლიურ 4 შემთხვევამდე შემცირდა

რა სიტუაციაა იტალიაში?

იტალიაში 2017 წლამდე ვაქცინაცია სავალდებულო მხოლოდ 4 დაავადებაზე იყო. წითელას დიდი აფეთქებების შემდეგ, როდესაც დაზარალებულთა რიცხვმა 4 000-ს მიაღწია, ქვეყანამ სავალდებულო გახადა რუტინული ვაქცინაცია 12 ანტიგენზე. საკანონმდებლო ცვლილებების მიხედვით, აუცრელი ბავშვებისათვის დაწესდა შეზღუდვა ბაღში, სკოლაში და სხვა, როგორც სახელმწიფო, ისე კერძო ორგანიზებულ დაწესებულებებში.

მონაცემთა ანალიზით ვიგებთ, რომ 2016 წელს იტალიაში 2 წლის ასაკის ბავშვთა მხოლოდ 87% იყო აცრილი წითელაზე, ხოლო 2018 წლის პირველ ნახევარში ეს მაჩვენებელი 94%-მდე გაიზარდა.

ორივე ქვეყანაში იმატებს ასევე არასავალდებულო ვაქცინაციის მაჩვენებლები. კვლევის ავტორთა აზრით, ამის მიზეზი აცრების უსაფრთხოებისა და ეფექტურობის შესახებ ჩატარებული აქტიური საინფორმაციო კამპანიებია.

რა სიტუაციაა საქართველოში?

საქართველოში 2019 წლის 1 იანვრიდან გეგმიური აცრები სავალდებულო გახდა. კანონპროექტის შემუშავების მიზეზი 2017 წლის ბოლოს რეგიონებში წითელას შემთხვევების მატება და ქვეყნის მასშტაბით მოსახლეობის იმუნიზაციით დაფარვის არასაკმარისი დონე გახდა. შესაბამისი კანონის ინიციატორების მხრიდან, ყურადღება ასევე გამახვილებული იყო ვაქცინაციის შესახებ საზოგადოების უნდობლობასა და არასათანადო ცოდნაზე, რაც ეფექტური პრევენციის ხელშემშლელი ფაქტორია.

ჯანდაცვის მსოფლიო ორგანიზაციის (WHO) მონაცემებით, იმუნიზაციით შესაძლებელია ყოველწლიურად 2-დან 3 მილიონამდე დიფტერიით, ტეტანუსით, წითელათი და სხვა დაავადებებით გამოწვეული სიკვდილიანობა ავიცილოთ თავიდან, ხოლო იმუნიზაციის გლობალური მოცვის შემთხვევაში დამატებით 1,5 მილიონი ადამიანი გადარჩება.