საზოგადოებრივ-ლიტერატურული ჟურნალი არილი მკითხველს მიმართავს და აცნობებს, რომ გამოცემა "ჩვეული ჟინით, თავისი ღირებულებების ჯიუტი რწმენითა და ახალ-ახალი იდეებით აგრძელებს საქმიანობას".

არილის მთავარი რედაქტორი, მწერალი და ლიტერატურათმცოდნე მალხაზ ხარბედია, 2 ივნისს, 50 წლის ასაკში გარდაიცვალა. სწორედ ხარბედიას მიეძღვნება ჟურნალის ახალი ნომერი, რომელზეც რედაქციაში უკვე მუშაობენ.

"წლების განმავლობაში არილი იყო მალხაზ ხარბედიას და ყველა იმ ადამიანის სააზროვნო სივრცე, ვინც იცოდა და იცის სიტყვის, თავისუფლების და თავისუფალი სიტყვის მნიშვნელობა", — წერს ჟურნალი.

"[ახალი ნომერი] იქნება მალხაზ ხარბედიას არილი და როგორც მას ენდომებოდა, იქნება სავსე არა ცრემლებითა და გლოვით, არამედ ფიქრით, ძიებებით, ამბებით, იუმორითა და პროტესტის მუხტით".

ჟურნალი "ამ კრიტიკულ მომენტში" მკითხველებს მხარდაჭერას და ახალი ნომრისთვის საჭირო ფინანსების მობილიზებაში დახმარებას სთხოვს. ერთ წელზე მეტია, გამოცემა სწორედ მკითხველების დონაციებით იბეჭდება.

არილს, რომელიც 1994 წლიდან გამოდის, შარშან, გამოცემის 30-ე საიუბილეო წელს, კულტურის სამინისტრომ დაფინანსება შეუწყვიტა. რედაქციის ცნობით, გადაწყვეტილების მიზეზი ჟურნალის "კრიტიკული პოზიცია" გახდა.

"არილისთვის დაფინანსების შეწყვეტა, ცხადია, კავშირშია ქვეყანაში მიმდინარე პოლიტიკურ პროცესებთან და ლოგიკური გაგრძელებაა ხელისუფლების მიერ წამოწყებული ანტიდასავლური პროპაგანდისა", — წერდა მაშინ ჟურნალი, რომელსაც ქართულ ლიტერატურაში შეტანილი განსაკუთრებული წვლილისთვის პრემია საბა აქვს მიღებული, — "არილი იყო და არის ლიტერატურასა და, ზოგადად, ხელოვნებაში დასავლური ღირებულებების, თავისუფლების ერთ-ერთი მთავარი რეპრეზენტატორი და ხმა".

არილმა ცოტა ხნის წინ შეიცვალა საბანკო ანგარიშების ნომრები. მკითხველებს ჟურნალისთვის მხარდაჭერის გამოცხადება შემდეგი რეკვიზიტებით შეუძლიათ:

საქართველოს ბანკი: GE93BG0000000609432191
თიბისი ბანკი: GE04TB7987736080100010