თურქეთში ტყის ხანძრებს უკვე მეორე ადამიანი ემსხვერპლა. ამის შესახებ ინფორმაციას Reuters ავრცელებს.

ქვეყნის სხვადასხვა რეგიონში ცეცხლი მეშვიდე დღეა გრძელდება. სახელმწიფო სააგენტო "ანადოლუს" ცნობით, იზმირის ოდემისის რაიონში ცეცხლის ჩაქრობისას ბაგირის ოპერატორი იბრაჰიმ დემირი დაიღუპა.

მანამდე, იმავე ტერიტორიაზე ხანძარს 81 წლის პარალიზებული კაცი ემსხვერპლა.

"თურქეთის ექვს ქალაქში ათეულობით ხანძარზე" პასუხისმგებლობა ჯგუფმა სახელწოდებით "ცეცხლის შვილები" აიღო. ამ ნაკლებად ცნობილმა დაჯგუფებამ განაცხადა, რომ ის კავშირშია აკრძალულ ქურთთა მუშათა პარტიასთან (PKK), რომელიც თურქეთის, აშშ-ისა და ევროკავშირის მიერ ტერორისტულ ორგანიზაციად არის აღიარებული. PKK-მ მაისში განაცხადა, რომ 40-წლიანი ამბოხის დასრულება და ჯგუფის დაშლა დაიწყო, თუმცა ხანძრებზე პასუხისმგებლობის აღებასთან დაკავშირებით კომენტარი არ გაუკეთებია.

თურქეთის შინაგან საქმეთა მინისტრის ალი იერლიკაიას თქმით, ქვეყნის დასავლეთით ხანძრებმა დაახლოებით 200 სახლი დააზიანა. დაზარალებულები დროებითი საცხოვრებლით უკვე უზრუნველყოფილნი არიან. ამავე კვირაში, დაახლოებით 50,000 ადამიანი დროებით იქნა ევაკუირებული ხანძრების გამო, რაც მაღალმა ტემპერატურამ, დაბალმა ტენიანობამ და ძლიერმა ქარებმა გააძლიერა.

"ანადოლუს" ცნობით, ხანძრების ახალი კერებით გააქტიურდა ხუთშაბათს სამხრეთ საკურორტო პროვინცია ანტალიაში და სტამბოლის სიახლოვეს ტყიან ზონაში. ხელისუფლებამ რამდენიმე კერის ლოკალიზება უკვე მოახერხა.