საქართველოს ფინანსთა ყოფილმა მინისტრმა, ივანე მაჭავარიანმა პროკურატურაში გამოკითხვის შემდეგ ჟურნალისტებთან ისაუბრა. მან განმარტა, რომ შეკითხვები ჩორჩანაში საგუშაგოს აღმართვას შეეხებოდა.

"ჩორჩანაში საგუშაგოს აღმართვაზე იყო შეკითხვები. არაფერი, მე განვუმარტე რაც იყო რეალობა, ჩემთვის უცნობი იყო ეს მოვლენა. მე ამის შესახებ გავიგე ტელევიზიებით, სულ რამდენიმე, არ ვიცი, კვირაა, რაც გააქტიურდა ეს საკითხი, მანამდე წარმოდგენა არ მქონდა. […] დადგმის შემდეგ არა, გავიგე რაც მედიაში გაჩნდა, ახლა, რამდენიმე კვირის წინ," — განაცხადა ივანე მაჭავარიანმა.

ცნობისთვის, საქართველოს პროკურატურაში გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე მიმდინარეობს. საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321-ე პრიმა მუხლის მე-2 ნაწილის ,"ა" ქვეპუნქტით.