საქართველოს მეოთხე პრეზიდენტი, გიორგი მარგველაშვილი ყოფილი თავდაცვის მინისტრის, პარტია გამარჯვებული საქართველოს დამფუძნებლის, ირაკლი ოქრუაშვილის დაკავების ფორმას აკრიტიკებს. მისი თქმით, პოლიტიკოსების, როგორც ყველა სხვა ადამიანის დაკავება, მაღალ სტანდარტს უნდა აკმაყოფილებდეს, განსაკუთრებით მაშინ, როცა "დაკავება პოლიტიკური მოტივის ეჭვებს აჩენს".

"დაკავების ფორმას შეხედეთ, რატომ არის ყოფილი თავდაცვის მინისტრი აყვანილი ქუჩაში ისე, რომ თითქოს მისი სპეცოპერაცია ჩატარდა, თითქოს ობიექტის ასაფეთქებლად მიდიოდა და ამის გაუნებელყოფა მოხდა? დაიბარეს და არ მივიდა? ჩემთვის ეს დაკავების ფორმა ნაცნობია, ჩვენ ეს ფორმა ტელედაკავებების სახით გავიარეთ, როცა ამ მეთოდით საზოგადოებას ესაუბრებოდნენ", — განაცხადა გიორგი მარგველაშვილმა ტელეკომპანია პირველის ეთერში.

მისივე განცხადებით, დღეს საზოგადოებას და ჟურნალისტებს პროკურორები და გამომძიებლები ელაპარაკებიან და ქართულ ოცნებაში არ დარჩა ადამიანი, რომელიც პოლიტიკურ პოზიციას ჩამოაყალიბებს.

"ის საუბრობდა, რომ შეუთვალეს — დააპატიმრებენ, მაგრამ უცხოეთიდან მაინც დაბრუნდა და ასეთ ადამიანს, ამ ფორმით რატომ აპატიმრებენ?", — სვამს კითხვას ყოფილი პრეზიდენტი.

შინაგან საქმეთა სამინისტრომ 20 ივნისის საქმეზე ყოფილი თავდაცვის მინისტრი ირაკლი ოქრუაშვილი და კიდევ 4 პირი დააკავა. უწყება დაკავებულებს ჯგუფური ძალადობის ორგანიზებასა და მონაწილეობას ედავება.

20 ივნისის მოვლენების შემდეგ ირაკლი ოქრუაშვილი უცხოეთში წავიდა, თუმცა რუსთავი 2-ის საქმეზე სტრასბურგის სასამართლოს გადაწყვეტილების შემდეგ დაბრუნდა და რუსთავი 2-თან დაკავშირებით სასამართლო დავა დაიწყო. მან თქვა, რომ რუსთავი 2-ის 100%-იანი წილის მფლობელი თავადაა, ქიბარ ხალვაში კი ნომინალური ფიგურა იყო. მისივე განცხადებით, აქვს დოკუმენტი, რომელიც ამ ინფორმაციას ადასტურებს და რომელსაც ხელს ქიბარ ხალვაში აწერს. მან ამ ხელმოწერის ექსპერტიზა მოითხოვა, ქიბარ ხალვაში სამხარაულის ექსპერტიზის ბიუროში უკვე იმყოფებოდა.

#სირცხვილია

საქართველოში, პარლამენტის წინ სამოქალაქო პროტესტი ამ დრომდე მიმდინარეობს. პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება. შედეგად, აქციები ამ დრომდე გრძელდება შინაგან საქმეთა მინისტრის გიორგი გახარიას გადაგომის მოთხოვნით.

20-21 ივნისის მოვლენებს საქართველოს პროკურატურა სახელმწიფო გადატრიალების მუხლით იძიებს. 20 ივნისის საქმეზე ამ დრომდე 17 პირია პასუხისგებაში მიცემული, მათ შორის ორი პოლიტიკური ლიდერი, ნიკა მელია და ირაკლი ოქრუაშვილი.