მართლმადიდებელი საპარლამენტთაშორისო ასამბლეის ფარგლებში რუსი დეპუტატები საქართველოს პარლამენტში იმყოფებიან. რიგით 26-ე სესია რამდენიმე წუთში გაიხსნება.

დღის წესრიგის მიხედვით, პარლამენტში სესიაზე IAO-ს გენერალური მდივანი, ანდრეას მიხაილიდისი ასამბლეის საქმიანობას მიმოიხილავს. ამასთანავე, წარადგენენ ფინანსური მართვის ანგარიშს, დაამტკიცებენ 2018-2019 წლის ფინანსურ ანგარიშს, ასამბლეის ყოფილ წევრებს დააჯილდოებენ და ოფიციალურ პირებს უფლებამოსილებას შეუწყვეტენ. დღის წესრიგით განსაზღვრულია, რომ გამოსვლების ნაწილში ორგანიზაციის საქმიანობას მიმოიხილავენ, განაახლებენ ორგანოების შემადგენლობას და 2019-2020 წლის საქმინობას დაგეგმავენ და დაამტკიცებენ.

19-22 ივნისს თბილისი მართლმადიდებლობის საპარლამენტთაშორისო ასამბლეას (IAO) პირველად მასპინძლობს. 26-ე გენერალური ასამბლეის სესიის თემაა "პარლამენტარიზმის წვლილი თანამედროვე სოციალური და პოლიტიკური მოვლენების გააზრებაში". აქტივისტებმა და მოქალაქეებმა პრეზიდენტის ყოფილ სასახლესთან მართლმადიდებლობის საპარლამენტთაშორისო ასამბლეაში რუსი დეპუტატების მონაწილეობა გუშინ, 19 ივნისს გააპროტესტეს.