თავდაცვის ყოფილ მინისტრს, ირაკლი ოქრუაშვილი რუსთავი 2-ის საქმეზე ქიბარ ხალვაშს სასამართლოში უჩივლებს. ინფორმაციას ამის შესახებ Prime Time ავრცელებს. როგორც გამოცემა წერს, სარჩელს ოქრუაშვილის 19 ივლისს, 11 საათზე შეიტანს.

2016 წელს ირაკლი ოქრუაშვილმა რუსთავი 2-თან საუბარში განაცხადა, რომ ტელეკომპანიის წილი ქიბარ ხალვაშს არასდროს ეკუთვნოდა და მისი მფლობელი თავად იყო. აღნიშნულის გამო ის სამართლებრივი დავის დაწყებას აპირებს.

ამავე დღეს რუსთავი 2-ის ჟურნალისტმა, ნოდარ მელაძემ P. S.-ში განაცხადა, რომ მას გადასცეს დოკუმენტი, რომელშიც ჩანს, რომ ტელეკომპანიის წილის მფლობელი ირაკლი ოქრუაშვილია და არა ქიბარ ხალვაში. მისი განმარტებით, 5-პუნქტიანი შეთანხმება 2010 წლის თებერვალშია გაფორმებული.

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში რჩება საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნის. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

დროებითი მექანიზმის გაუქმების საკითხი გასაჩივრებას არ ექვემდებარება, თუმცა მხარეებს შეუძლიათ გადაწყვეტილების სხვა ნაწილები სტრასბურგის სასამართლოს დიდ პალატაში გაასაჩივრონ. ამისთვის მათ სამთვიანი ვადა აქვთ.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა.