რა არის ყველაზე დიდი გამოწვევა, რომელიც ზაფხულის ცხელ დღეს მოჰყვება? ალბათ ჭარბოფლიანობასთან გამკლავება.

განსაკუთრებით მაშინ, როცა ის დისკომფორტს ქმნის და სუნი აქვს. მაისურზე ლაქებიც შეიძლება არ იყოს სასიამოვნო. თუმცა, ზაფხულის განმავლობაში შესაძლოა ყოველდღიურ ცხოვრების წესში ცვლილებების შეტანა, რომელიც ამ პრობლემას გაამარტივებს.

ამერიკელი ექიმები და მოდის დიზაინერი ოფლისგან შეწუხებულ მოქალაქეებს იმ რჩევებს უზიარებენ, რომლებიც მზით და სიცხით სავსე გარემოში თავის მოხერხებულად დაძვრენის საშუალებას მისცემთ. და კი, ეს რჩევები ყოველდღიურ ჰიგიენასა და დეოდორანტის გამოყენებას სცდება.

1. შეცვალეთ კვების წესი

საკვები პროდუქტი ოფლის გამოყოფის რაოდენობასა და მის სუნზე დიდ გავლენას ახდენს. თუ დისკომფორტის თავიდან არიდება გსურთ, კოფეინსა და ცხარე კერძებს მოერიდეთ.

"კოფეინი ცენტრალური ნერვული სისტემის აღგზნებას იწვევს, რაც თავის მხრივ, ოფლის ჯირკვლებზე ახდენს გავლენას და სხეულს ჭარბი ოფლის გამოყოფაში ეხმარება. ასევეა მწარე საჭმელი, როგორიცაა წიწაკა, ცხარე სოუსები, რომლებიც გამოყოფილი ოფლის ოდენობას ზრდიან", — ამბობს კოსმეტიკური და კლინიკური კვლევების დირექტორი, ექიმი ჯოშულა ზეიხნერი.

თუ გსურთ, რომ სხეულმა ნაკლები ოფლი გამოყოს, მიირთვით წვნიანი ხილი, როგორიცაა საზამთრო და ვაშლი. Murad Skincare-ის დამფუძნებელი დერმატოლოგი და ექიმი ჰოვარდ მურადი ამბობს, რომ ორგანიზმს ასევე ამშვიდებს ისეთი პროდუქტი, როგორიცაა კიტრი.

2. ჩაიცვით მსუბუქი სამოსი

ორგანიზმი ოფლს გამოყოფს მაშინ, როცა ის გადახურებულია და გრილდება. ამიტომ, ჯობს ატაროთ ის ტანსაცმელი, რომელიც "სუნთქავს", ანუ კანს უჰაეროდ არ დატოვებს. მაგალითად ბამბის ნაჭრით შეკერილი სამოსი.

დიზაინერი კრისტიან სირიანო ზაფხულში ღია და ფერადი სამოსის ტარებასაც გვირჩევს. სხვა დიზაინერები რეკომენდაციას უწევენ გამჭვირვალე მაისურებსაც.

3. დაუმეგობრდით სველ ხელსახოცებს

ოფლი ხანდახან მძაფრი სუნისაა, რაც კანზე არსებული ბაქტერიების დამსახურებაა.

მწვავე სუნიანობა ოფლის სხეულზე დიდი ხნით დატოვებას მოსდევს. ზეიხნერის თქმით, სველი ხელსახოცით გაწმენდა და გაშრობა სიტუაციას ბევრად შეამსუბუქებს.

4. მართეთ სტრესი

სტრესული სიტუაციების დროს, ოფლის გამოყოფა იზრდება. ალბათ ერთხელ მაინც შეგიმჩნევიათ ადამიანი, რომელიც ნერვიულობის ან ბრაზის დროს "ოფლში იწურება".

მურადი ამბობს, რომ მარტივი სუნთქვითი ვარჯიშები სტრესის შემცირებაში გვეხმარება. ის ასევე ქლოროფილის აბებს უწევს რეკომენდაციას — ის ამცირებს იმ მძაფრ სუნს, რომელიც ხანდახან ოფლს მოჰყვება. მწვანე ბოსტნეული, როგორიცაა ბროკოლი და ბრიუსელის კომბოსტო, ამ სუნს ასევე აქრობს.

ბონუსი: ოფლიანობა ნორმალურია

ოფლის გამოყოფა სხეულის სრულიად ჯანმრთელი პროცესია. ამ გზით ორგანიზმი ცდილობს, რომ მეტისმეტი სიცხისგან გათავისუფლდეს. ეს გადარჩენისთვის აუცილებელი პროცესიცაა.

თუ ნორმაზე ოთხჯერ ან ხუთჯერ მეტი ოფლიანობა გაწუხებთ, ეს შესაძლოა ჰიპერჰიდროზის ნიშანი იყოს. ამ დარღვევის დროს ადამიანი ოფლში იწურება მაშინაც კი, როცა არც ცხელა და არც ვარჯიშობს.

როდის და რატომ ირღვევა ჩვენი სხეულის გაგრილების ბუნებრივი მექანიზმი? ჭარბოფლიანობასა და მისი მკურნალობის გზებზე რუსთავი 2-ის გადაცემა სხვა შუადღეში ისაუბრეს.