რუსეთის დუმის დეპუტატი სერგეი გავრილოვი საქართველოს ურჩევს, რომ ადამიანის უფლებათა სფეროში გამოცდილება რუსეთისგან გაიზიაროს. გავრილოვი დუმაში სამოქალაქო საზოგადოების განვითარების, საზოგადოებრივი და რელიგიური გაერთიანებების საკითხების კომიტეტის თავმჯდომარეა.

გავრილოვმა მადლობა გადაუხადა რუსეთის ომბუდსმენს, რადგან მან ოპერატიულად უპასუხა "საქართველოში რუს დეპუტატებზე თავდასხმას".

"ძალიან სამწუხაროა, რომ საქართველო არ შედის ომბუდსმენების ევრაზიულ ალიანსში, რადგან საქართველოს შიდაპოლიტიკური მდგომარეობის სტაბილიზაციისთვისა და დემოკრატიული მოდელის შენების იმიჯისთვის, უმჯობესი იქნებოდა ამ ქვეყანას ადამიანის უფლებათა სფეროში გამოცდილება ჩვენი ქვეყნისგან აეღო", — განაცხადა გავრილოვმა.

რაც შეეხება რუსეთში ადამიანის უფლებათა მდგომარეობას, საერთაშორისო ორგანიზაციები, მათ შორის Freedom House და Amnesty International ხშირად საუბრობენ და თავიანთ ანგარიშებში აღნიშნავენ, რომ ისინი უგულებელყოფილია. ორგანიზაციები აპელირებენ ლგბტ თემის უფლებების დარღვევასა და დევნაზე. გარდა ამისა, პრესის თავისუფლების ინდექსით, რუსეთი 180 ქვეყანას შორის 149 ადგილს იკავებს.

ადამიანის უფლებების დარღვევის კუთხით ერთ-ერთი ბოლო შემთხვევა ივნისში მოხდა, როდესაც გამომძიებელი-ჟურნალისტი ივან გოლუნოვი ნარკოდანაშაულის ბრალდებით დააკავეს. ჟურნალისტი ამბობდა, რომ დაკავებისას ის სცემეს და ნარკოტიკი ჩაუდეს. რამდენიმე დღეში მის წინააღმდეგ სისხლისსამართლებრივი დევნა მტკიცებულებების არარსებობის გამო შეწყდა.

20 ივნისის აქცია

მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ, რომელიც, მისი დის თქმით, უბრალო გამვლელი იყო და აქციაში არ მონაწილეობდა. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი. შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა.