საქართველოს ყოფილი ელჩი ლიეტუვაში, ხათუნა სალუქვაძე ფეისბუქის საკუთარ გვერდზე მიმართვას ავრცელებს. იგი ლიეტუველებს მიმართავს, აქტიურად გააგრძელონ საქართველოში სტუმრობა და მეგობრებსაც უთხრან, რომ ჩავიდნენ:

"ძვირფასო ლიეტუველო მეგობრებო, პუტინმა რუსულ ავიახაზებსა და რუს ტურისტებს საქართველოში ჩასვლა აუკრძალა. როგორც ადრე, გრძელვადიან პერიოდში ეს ემბარგო ჩემი ქვეყნის ეკონომიკას მხოლოდ გააძლიერებს. ვიცი, რამდენად გიყვართ საქართველო და ლიეტუველი ტურისტებიც ძალიან უყვართ აქ... ნუ მივცემთ ჩაგვრის საშუალებას აგრესორს".

გუშინ 22 ივნისს ცნობილი გახდა, რომ საქართველოს ავიაკომპანიებს რუსეთში ფრენებს აუკრძალავენ. ინფორმაცია რუსული გამოცემა TASS ავრცელებს. როგორც გამოცემას რუსეთის ტრანსპორტის სამინისტროში უთხრეს, შეზღუდვა 8 ივლისიდან ამოქმედდება.

21 ივნისს ვლადიმერ პუტინმა საქართველოს მიმართულებით რუსული ავიაკომპანიების ფრენები აკრძალა. "რუსეთის ნაციონალური უსაფრთხოების უზრუნველსაყოფად" ასე ჰქვია დოკუმენტს, რომელშიც პუტინი აცხადებს, რომ 2019 წლის 8 ივლისიდან რუსულ ავიაკომპანიებს, მათ შორის კომერციულებს დროებით ეკრძალებათ რუსეთის ფედერაციიდან საქართველოს მიმართულებით ფრენა.