რა არის ყველაზე მნიშვნელოვანი მომხმარებლისთვის? რა პრობლემას აწყდება მათი უმეტესობა კონკრეტული პროდუქტის გამოყენებისას და რას მოელიან ბრენდისგან? ამ კითხვებზე პასუხის საპოვნელად ბიზნესები სხვადასხვა გზას მიმართავენ, ქართულ ბაზარზე კი უკვე გამოჩნდა ახალი პლატფორმა — Feedio, რომელსაც მომხმარებლის გამოცდილების მართვა ახალ საფეხურზე აჰყავს.

სხვადასხვა კომპანიის ფილიალებსა თუ ოფისებში მომხმარებლების მხრიდან ბევრი პრობლემა თუ იდეა ფიქსირდება, რომელიც სათავო ოფისამდე ხშირად ვერც აღწევს. მომხმარებლის გამოცდილების მართვა დიდი ხანია გასცდა მომსახურების ხარისხის შეფასებასა და პერიოდულ გამოკითხვებს. დღეს ბიზნესისთვის მნიშვნელოვანია, დროულად დაინახოს, რას ამბობენ მომხმარებლები, სად მეორდება პრობლემები და რა საჭიროებს რეაგირებას. სწორედ ამ მიზანს ემსახურება ახალი B2B SaaS პლატფორმა.

Feedio არის პლატფორმა, რომელიც აგროვებს პარტნიორი ბიზნესების მომხმარებელთა უკუკავშირს ფიზიკური ოფისებიდან თუ სხვადასხვა ციფრული არხიდან, იქნება ეს სოციალური მედია, რევიუები, ჩატები, ვებგვერდები თუ სხვა და ეხმარება კომპანიებს მომხმარებელთა უკუკავშირის მიღებაში. ეს ღირებული მონაცემები კი ხელს უწყობს ბიზნესებს, დროულად მიიღონ მნიშვნელოვანი გადაწყვეტილებები.

"პლატფორმა ეხმარება ბიზნესებს, რომლებიც ყოველდღიურად ემსახურებიან მომხმარებლებს ფილიალებში, მაღაზიებში, რესტორნებსა თუ კლინიკებში მიღებულ უკუკავშირს სხვადასხვა ციფრული არხიდან შემოსულ ინფორმაციასთან აერთიანებს. შედეგად, ბრენდს შეუძლია დაინახოს როგორც კონკრეტული ფილიალის გამოწვევები, ისე მთელი ქსელის საერთო სურათი", – ამბობს პლატფორმის ერთ-ერთი შემქმნელი, ვასო კუსიანი.

სისტემაში ინტეგრირებული AI აგენტები აანალიზებენ უკუკავშირს, გამოყოფენ განმეორებად თემებს და სათავო ოფისს პრიორიტეტების განსაზღვრაში ეხმარებიან — რა მოითხოვს დაუყოვნებლივ მოქმედებას და სად არის საჭირო გრძელვადიანი ცვლილება.

ამ პროცესში მნიშვნელოვანი როლი მომხმარებელთან უშუალო კონტაქტში მყოფ თანამშრომლებს აქვთ. პლატფორმას აქვს გემიფიკაციის მექანიზმები, რაც სერვისის მენეჯერებს დამატებით მოტივაციას აძლევს, გააზიარონ ის შენიშვნები და იდეები, რომლებსაც ყოველდღიურად ისმენენ. გასაზიარებელი ბმულის საშუალებით კი ბრენდებს შეუძლიათ უშუალოდ მომხმარებლებს დაუსვან კითხვები და მათთვის მნიშვნელოვან თემებზე მიიღონ პასუხები.

Feedio უკუკავშირს ყოველდღიური გადაწყვეტილებების საფუძვლად აქცევს და ფილიალებს, სათავო ოფისსა და მომხმარებლებს ერთ პროცესში აერთიანებს. როგორც მისი შემქმნელები On.ge-სთან საუბარში აღნიშნავენ, პლატფორმა ამ ეტაპზე რამდენიმე კომპანიაში ინერგება, კომპანიების ნაწილთან კი მოლაპარაკებები მიმდინარეობს.