ისრაელის პრეზიდენტმა იცხაკ ჰერცოგმა Flydubai-ს რეისის ექვს მგზავრს გმირობისთვის ისრაელის უმაღლესი სამოქალაქო სიმამაცის ჯილდო გადასცა, მათ შორის ქართველ ექიმი შოთა მუსაევია.

ჯილდო თვითმფრინავის გამტაცებელი პილოტის განეიტრალებისთვის ასევე გადაეცათ ტალი მანესს, ზვიკა მანესს, იანივ ჰაიუნს, ასაფ რაჯუანსა და ორ პარდილოვს.

ცნობისთვის, პრეზიდენტმა ჰერცოგმა თავდაპირველად თვის დასაწყისში გამოაცხადა, რომ ჯილდოზე ისრაელის ოთხ მოქალაქეს წარადგენდა: იანივ ჰაიუნს, დოქტორ შოთა მუსაევს, ზვიკა მანესსა და ასაფ რაჯუანს. მოგვიანებით მან აღნიშნა, რომ სიას ზვიკას მეუღლეს, ტალი მანესსაც დაამატებდა.

"იმ მომენტში, როდესაც ამდენი ადამიანის სიცოცხლეს საფრთხე ემუქრებოდა, თქვენ იმოქმედეთ ყოყმანის გარეშე, სიმამაცით, საზრიანობითა და საოცარი ურთიერთპასუხისმგებლობით.

თქვენ თავი გაწირეთ სხვების გადასარჩენად და დიდი კატასტროფა აირიდეთ თავიდან. მთელმა მსოფლიომ დაინახა ისრაელის საზოგადოების მშვენიერი და მამაცი სახე. ვამაყობ თქვენით და მადლობას გიხდით ისრაელის სახელმწიფოს სახელით," — განუცხადა მათ ჰერცოგმა.

შეგახსენებთ, 30 სექტემბერს, დუბაი-თელ-ავივის Flydubai-ის FZ1073 რეისზე ერთ-ერთმა პილოტმა კაპიტანს დანით მიაყენა ჭრილობები, რის შემდეგაც თვითმფრინავმა სწრაფად დაკარგა სიმაღლე და რამდენიმე წუთის განმავლობაში მისი მართვა საფრთხის ქვეშ აღმოჩნდა. დაჭრილმა კაპიტანმა კაბინის კარი გახსნა, რის შემდეგაც რამდენიმე მგზავრი და ეკიპაჟის წევრი კაბინაში შევიდა და თავდამსხმელი გაანეიტრალა. ბორტზე მყოფმა ექიმმა, შოთა მუსაევმა, მძიმედ დაჭრილ კაპიტანს პირველადი სამედიცინო დახმარება გაუწია. თვითმფრინავმა საბოლოოდ საგანგებო დაშვება საუდის არაბეთში, ტაბუკის აეროპორტში განახორციელა და ბორტზე მყოფი 174 ადამიანი უსაფრთხოდ გადმოვიდა.