საქართველოს პრემიერ-მინისტრი მამუკა ბახტაძე დღეს, 11 ივნისს აშშ-ს სახელმწიფო მდივანს მაიკ პომპეოს შეხვდება. შეხვედრის თარიღის შესახებ ინფორმაცია იმედმა გაავრცელა.

თავდაპირველად, მაიკ პომპეოსა და მამუკა ბახტაძის შეხვედრა ამერიკის შეერთებული შტატების სახელმწიფო დეპარტამენტის პრესსპიკერმა მორგან ორტაგუსმა დააანონსა. მან ბრიფინგზე აღნიშნა, რომ ამერიკული მხარე შეხვედრაზე ხაზს გაუსვამს სამხრეთ ოსეთში ჩატარებული არჩევნების არალეგიტიმურობას და მხარს დაუჭერს საქართველო ტერიტორიულ მთლიანობას.

"ჩვენი პოზიცია უცვლელია, სამხრეთ ოსეთი საქართველოს განუყოფელი ნაწილია, შესაბამისად, ჩვენ კიდევ ერთხელ მკაფიოდ ვადასტურებთ საქართველოს სუვერენიტეტისა და ტერიტორიული მთლიანობის მხარდაჭერას საერთაშორისოდ აღიარებულ ფარგლებში. სახელმწიფო მდივანი მოუთმენლად ელის საქართველოს პრემიერთან ორმხრივი თანამშრომლობის შესახებ მოლაპარაკებას" — აღნიშნა მორგან ორტაგუსმა.

საქართველოს პრემიერ-მინისტრი მამუკა ბახტაძე ამერიკაში 5-14 ივნისს სხვადასხვა შეხვედრებს მართავს. ის უკვე იმყოფებოდა კალიფორნიის Commonwealth club-ში საჯარო გამოსვლისას საქართველოს საინვესტიციო გარემოსა და ქვეყნის პოტენციალზე ისაუბრა.

მთავრობის ადმინისტრაციის ინფორმაციით, მამუკა ბახტაძე ვაშინგტონში, ამერიკის შეერთებული შტატების აღმასრულებელი და საკანონმდებლო ხელისუფლების მაღალი რანგის წარმომადგენლებს შეხვდება. პრემიერ-მინისტრი მისასალმებელი სიტყვით გახსნის აშშ-საქართველოს სტრატეგიული პარტნიორობის ყოველწლიურ კონფერენციას, რომელსაც აშშ-ის მშვიდობის ინსტიტუტი მასპინძლობს.

ვაშინგტონში ვიზიტის დასასრულს, მამუკა ბახტაძის სახელით საქართველოს დამოუკიდებლობის დღისადმი მიძღვნილი მიღება გაიმართება.