ცოტა ხნის წინ NASA-მ საზოგადოებას იუპიტერის თანამგზავრ ევროპაზე გაკეთებული აღმოჩენის შესახებ ანგარიში წარუდგინა.

ასტრონომებმა კოსმოსური ტელესკოპის საშუალებით გადაიღეს ფოტომასალა, სადაც ჩანს, რომ თანამგზავრის ზედაპირიდან სავარაუდოდ წყლის ორთქლის ჭავლები იფრქვევა.

"თანამგზავრ ევროპაზე არსებული ოკეანე ერთ-ერთი საუკეთესო ადგილია დედამიწის მიღმა სავარაუდო სიცოცხლის არსებობისათვის. წყლის ჭავლები, თუ ისინი მართლაც არსებობს, საუკეთესო გზაა ევროპადან წყლის ნიმუშის ასაღებად“, ამბობს NASA-ს მისიის ერთ-ერთი წევრი ჯეოფ იოდერი.

ევროპაზე წყალი დაახლოებით 200 კმ სიმაღლეზე იფრქვევა, რის შემდეგაც უკან, კვლავ ზედაპირზე ბრუნდება. ევროპას უზარმაზარი ოკეანე აქვს, რომელიც დედამიწის ოკეანეებზე ორჯერ მეტ წყალს შეიცავს, მაგრამ ეს ოკეანე დაფარულია უკიდურესად ცივი და გაურკვეველი სისქის ყინულით.

იუპიტერის წინ ევროპას ჩავლისას, ჯგუფმა 15 თვის მანძილზე 10 სხვადასხვა შემთხვევა დააფიქსირა. აქედან სამ შემთხვევაში კი მათ სავარაუდო ამოფრქვევები დაინახეს.

თუკი დამტკიცდა, რომ თანამგზავრ ევროპაზე წყლის გეიზერებია ის იქნება მეორე მთვარე მზის სისტემაში, რომელზეც წყლის გეიზერები არსებობს. 2005 წელს, NASA-ს ორბიტერმა კასინიმ აღმოაჩინა წყლის ჭავლური სვეტები, რომლებიც სატურნის თანამგზავრის ზედაპირზე იფრქვეოდა.