ხორავას ქუჩის საქმეზე მოზარდის ჯგუფურად მკვლელობაში ბრალდებულს, მიხეილ კალანდიას აღკვეთი ღონისძიების სახით პატიმრობა შეუფარდეს. შესაბამისი გადაწყვეტილება მოსამართლემ რამდენიმე წუთის წინ მიიღო.

დაცვის მხარე გირაოს ითხოვდა, თუმცა მოსამართლემ მათი არგუმენტები არ გაიზიარა. მისი განცხადებით, განახლებული გამოძიების დროს საგამოძიებო ორგანომ მოიპოვა იმის მტკიცებულებები, რომ შესაძლოა მიხეილ კალანდიამ დანაშაული ჩაიდინა. წინასასამართლო სხდომა 11 ივლისს ჩაინიშნა.

სხდომა დასაწყისში ღია იყო, თუმცა პროკურორმა მოითხოვა მისი დახურვა იმ მოტივით, რომ მიხეილ კალანდია ხორავას ქუჩაზე მომხდარი მკვლელობისას არასრულწლოვანი იყო. შუამდგომლობა გაიზიარა დაცვის მხარემ და თავად ბრალდებულმაც.

მოსამართლის თქმით, პროცესი სრულად დაიხურება ვინაიდან საქმეში კიდევ სხვა არასრულწლოვნებიც ფიგურირებენ. მან ასევე განუმარტა ბრალდებულს რომ საქმე არასრულწლოვანთა მართლმსაჯულების კოდექსით განიხილება.

პროცესზე შესვლამდე ადვოკატმა, ანა კოტეტიშვილმა ჟურნალისტებს უთხრა, რომ მიხეილ კალანდიას წინააღმდეგ საქმეში პირდაპირი მტკიცებულება არ დევს, მათ შორის არც დანაშაულის იარაღთან დაკავშირებით. პროცესზე დასასწრებად მივიდა კალანდიას ბაბუა, ბორის კაკუბავა, რომელსაც მოკლულის მამა ზაზა სარალიძე ადანაშაულებდა დამნაშავის მფარველობაში.

მიხეილ კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით დღეს, 4 ივნისს მას შემდეგ დააკავეს, რაც სააპელაციო სასამართლოს განაჩენი დადგა. ის ბრალს არ აღიარებს.

სააპელაციომ განაცხადა, რომ დავით სარალიძე ბრალდებულმა გ.ჯ.-მ დაუდგენელ პირებთან ერთად მოკლა. შინაგან საქმეთა სამინისტროში განაცხადეს, რომ პირველი ინსტანციის განაჩენის შემდეგ მათ მოიპოვეს მტკიცებულებები, რომლებიც მკვლელობაში კალანდიას თანამონაწილეობის ეჭვს ამყარებდა.

ვინ არის მიხეილ კალანდია

მიხეილ კალანდია 2017 წლის პირველ დეკემბერს ხორავას ქუჩაზე მოზარდებს შორის მომხდარი კონფლიქტის ერთ-ერთი მონაწილეა. კალანდიამ გამოძიებისა და სასამართლო პროცესის დროს ჩვენება არაერთხელ შეცვალა. მან პირველად თქვა, რომ ბრალდებულ არასრულწლოვნებს ჩხუბის დროს დანა არ ჰქონიათ. მომდევნო პროცესზე კი მოწმემ ჩვენების შეცვლა გასულ პროცესზე ბრალდებული მეგობრების დაცვის სურვილით ახსნა. კალანდიამ სასამართლოზე დეტალურად ისაუბრა, თუ ვის ეჭირა დანა, ვინ ურტყამდა დანას. მან ასევე თქვა, რომ თავად მოგვიანებით, რამდენიმე წამით შევიდა ფარდულში გასაშველებლად. კალანდიას მიერ შეცვლილი საბოლოო სცენარი, ემთხვევა პროკურატურის ვერსიას.

ხორავას ქუჩაზე მოკლული დავით სარალიძის მამა, ზაზა სარალიძე ცრუ ჩვენებისთვის მიხეილ კანალდიას სისხლისსამართლებრივ პასუხისმგებლობას ითხოვს.

პარლამენტში შექმნილმა დროებითმა საგამოძიებო კომისიამ შინაგან საქმეთა სამინისტროს ორი რეკომენდაციით მიმართა, რომ დაიწყოს სისხლისსამართლებრივი დევნა კალანდია მიმართ, დავით სარალიძის ჯგუფურად მკვლელობაში თანამონაწილეობის საქმეზე.

2018 წლის ივნისში შსს-მ დააკავა მერაბ მორჩაძე, რომელიც საქმეში მონაწილე ერთ-ერთი მოზარდის ნათესავია. უწყება მას მიხეილ კალანდიაზე ზეწოლას ედავებოდა. მორჩაძემ ბრალი აღიარა და ის სასამართლო დარბაზიდან გაათავისუფლეს.

შსს-ში აცხადებდნენ, რომ მორჩაძე სასამართლოში ჩვენების შეცვლის მიზნით, გავლენა მოახდინა დანაშაულის დაფარვაში ბრალდებულ მიხეილ კალანდიაზე, რომელიც მკვლელობის ჩადენაში ამხელდა მერაბ მორჩაძის მეგობრის შვილს, ბრალდებულ გ.ჯ.-ს. მათივე თქმით, მერაბ მორჩაძე არაერთხელ შეხვდა ძმებ კალანდიებს, ბრალდებულ გ. ჯ.-ს სასარგებლოდ ჩვენების შეცვლის მიზნით, გადასცა მათ გარკვეული თანხა.

გაიგეთ მეტი: