არასრულწლოვან დავით სარალიძის ჯგუფურად განზრახ მკვლელობაში ბრალდებულის, მიხეილ კალანდიას ძმა, ლუკა კალანდია აცხადებს, რომ 2017 წლის 3 დეკემბერს კალანდიებს ფიზიკური და მორალური ზეწოლის შედეგად მოაწერინეს ხელი იმ ჩვენებაზე, რომელიც მათი დაწერილი არ იყო. ამის შესახებ ლუკა კალანდიამ ტვ პირველს განუცხადა.

"მირზა სუბელიანს რომ კალანდიას მფარველობის მიზნით უწყებაზე ზეწოლა განეხორციელებინა, ჩვენ 3 დეკემბერს აქ ფიზიკურად არავინ გაგვისწორდებოდა", — განაცხადა კალანდიამ.

ჟურნალისტის კითხვაზე, აყენებდნენ თუ არა სამართალდაცავები ფიზიკურ და სიტყვიერ შეურაცხყოფას, ხელი მოეწერათ ჩვენებისთვის, კალანდი პასუხობს: "ზუსტად ასე მოხდა".

მან ასევე თქვა, რომ მიხეილ კალანდიამ ჩვენებები მერამ მორჩაძის ზეწოლის გამო შეცვალა. მისი თქმით, ამას აქამდე მალავდნენ, მაგრამ ახლა დასაკარგი აღარაფერი აქვთ და "ყველა კარტს გახსნიან".

მოგვიგზავნეს, ვითომდა ჩვენი ნათესავი ადამიანი სახლში, რომ მიხეილს შეეცვალა ჩვენება. ჩვეულებრივად, განახორციელა ზეწოლა, რის შედეგადაც მიხეილმა შეცვალა მერე ჩვენება", — აცხადებს ის რუსთავი 2-თან საუბარში.

ვინ არის მიხეილ კალანდია

მიხეილ კალანდია 2017 წლის პირველ დეკემბერს ხორავას ქუჩაზე მოზარდებს შორის მომხდარი კონფლიქტის ერთ-ერთი მონაწილეა. კალანდიამ გამოძიებისა და სასამართლო პროცესის დროს ჩვენება არაერთხელ შეცვალა. მან პირველად თქვა, რომ ბრალდებულ არასრულწლოვნებს ჩხუბის დროს დანა არ ჰქონიათ. მომდევნო პროცესზე კი მოწმემ ჩვენების შეცვლა გასულ პროცესზე ბრალდებული მეგობრების დაცვის სურვილით ახსნა. კალანდიამ სასამართლოზე დეტალურად ისაუბრა, თუ ვის ეჭირა დანა, ვინ ურტყამდა დანას. მან ასევე თქვა, რომ თავად მოგვიანებით, რამდენიმე წამით შევიდა ფარდულში გასაშველებლად. კალანდიას მიერ შეცვლილი საბოლოო სცენარი, ემთხვევა პროკურატურის ვერსიას.

ხორავას ქუჩაზე მოკლული დავით სარალიძის მამა, ზაზა სარალიძე ცრუ ჩვენებისთვის მიხეილ კანალდიას სისხლისსამართლებრივ პასუხისმგებლობას ითხოვს.

პარლამენტში შექმნილმა დროებითმა საგამოძიებო კომისიამ შინაგან საქმეთა სამინისტროს ორი რეკომენდაციით მიმართა, რომ დაიწყოს სისხლისსამართლებრივი დევნა კალანდია მიმართ, დავით სარალიძის ჯგუფურად მკვლელობაში თანამონაწილეობის საქმეზე.

2018 წლის ივნისში შსს-მ დააკავა მერაბ მორჩაძე, რომელიც საქმეში მონაწილე ერთ-ერთი მოზარდის ნათესავია. უწყება მას მიხეილ კალანდიაზე ზეწოლას ედავებოდა. მორჩაძემ ბრალი აღიარა და ის სასამართლო დარბაზიდან გაათავისუფლეს.

შსს-ში აცხადებდნენ, რომ მორჩაძე სასამართლოში ჩვენების შეცვლის მიზნით, გავლენა მოახდინა დანაშაულის დაფარვაში ბრალდებულ მიხეილ კალანდიაზე, რომელიც მკვლელობის ჩადენაში ამხელდა მერაბ მორჩაძის მეგობრის შვილს, ბრალდებულ გ.ჯ.-ს. მათივე თქმით, მერაბ მორჩაძე არაერთხელ შეხვდა ძმებ კალანდიებს, ბრალდებულ გ. ჯ.-ს სასარგებლოდ ჩვენების შეცვლის მიზნით, გადასცა მათ გარკვეული თანხა.