დილიდან თბილისში "დეზერტირების ბაზრობასთან" გარემოვაჭრეები ბაზრობის ტერიტორიაზე სარეაბილიტაციო სამუშაოების დაწყებას აპროტესტებენ. ადგილზე შეკრებილებმა გზაც გადაკეტეს, მაგრამ მოგვიანებით პოლიციამ ისინი გზის სავალი ნაწილიდან გადაიყვანა.

14 სექტემბერს კომპანია "თბილისი მოლმა" განცხადება გაავრცელა, სადაც წერს, რომ "დეზერტირების ბაზრობის" ტერიტორიაზე არსებული კრიტიკული სანიტარიულ-ჰიგიენური ვითარებისა და ამორტიზებული მიწისქვეშა ინფრასტრუქტურის გამო, მასშტაბური გადაუდებელი სარეაბილიტაციო სამუშაოები იწყება. კომპანიის განმარტებით, სანიტარიული დარღვევები საზოგადოების ჯანმრთელობას საფრთხეს უქმნის.

"უსაფრთხოებისა და სანიტარიული სტანდარტების დაცვის მიზნით, სარეაბილიტაციო სამუშაოების მიმდინარეობის პერიოდში აღნიშნულ მონაკვეთზე საქმიანობა დროებით შეჩერდება, შიდა ტერიტორიაზე დასაქმებულ პირებს, შესაბამის სამსახურებთან კონსულტაციის შემდეგ დაეგზავნებათ შეტყობინება, მიმდებარე ტერიტორიაზე ალტერნატიული სავაჭრო ფართების შეთავაზების თაობაზე," — ვკითხულობთ განცხადებაში.

გარემოვაჭრეები ეჭვობენ, რომ მათ რეაბილიტაციის შემდეგ ბაზრის ტერიტორიაზე დაბრუნებას ვერ შეძლებენ და ახალ სავაჭრო კომპლექსს ააშენებენ.

"ბატონ ბიძინას, ბატონ კალაძეს, კობახიძეს, ყველას, ბაზრის ადმინისტრაციას, ბატონ ხვიჩა მაქაცარიასაც ვთხოვთ, რომ როგორც ვმუშაობთ, ესე გვამუშაოს და ვიყოთ ჩვენთვის. მეტს არაფერს არ მოვითხოვთ სახელმწიფოსგან, არაფერს. იჯარასაც ყველაფერს ვიხდით. 10 დღის განმავლობაში ჩეკიც არ აიღეს. შევდივართ ადმინისტრაციაში, ვეკითხებით რა ხდება — არ ვიცით, რა ხდება — არ ვიცით. გამოიძახებ პოლიციას და ყველას დაგვიჭერენ. ეგ არის ამათი პრივილეგია — დაჭერა!" — ამბობს ერთ-ერთი გარემოვაჭრე "ტვ პირველთან" საუბრისას.

გარემოვაჭრეები თბილისის მერიისგან პასუხს ითხოვენ. მათი განმარტებით, ტერიტორიის დატოვება ახსნა-განმარტების გარეშე მოსთხოვეს და არ იციან როდის დასრულდება სამუშაოები.

"აი ელემენტარული, გამოვიდნენ, გვითხრან — არც გვესაუბრებიან, არც ჩეკს არ იღებენ, ამდენი ხალხის ნერვებზე თამაშობენ. დილას რომ მოდიხარ და გათხრილი დაგხვდება აქაურობა, რა ნერვებზე უნდა იყო?" — ამბობს ერთ-ერთი გარემოვაჭრე "ტვ პირველთან" საუბარში.