51-ე სკოლის მოსწავლეების მკვლელობის საქმეში მოწმეზე ზეწოლის ბრალდებით დაკავებული მერაბ მორჩაძის ადვოკატი ზაზა თავაძე ადასტურებს, რომ მერაბ მორჩაძე, მიხეილ კალანდიას ახლობელია. კალანდია კი ყოფილი პროკურორის მირზა სუბელიანის ოჯახის წევრია. ამის შესახებ ზაზა თავაძემ ჟურნალისტებს შინაგან საქმეთა სამინისტროსთან განუცხადა.

ზაალ თავაძის განცხადებით, მორჩაძეს არასრულწლოვნებმა დახმარების თხოვნით მიმართეს, თუმცა, მან არ დააკონკრეტა, რა სახის დახმარება გაუწია მორჩაძემ არასრულწლოვნებს.

ადვოკატის თქმით, მერაბ მორჩაძემ მიხეილ კალანდიას სასამართლოში გაკეთებული მესამე ჩვენების შემდეგ მიაკითხა და სახლში წაიყვანა.

ზაალ თავაძე აცხადებს, რომ სავარაუდოდ, გამოძიება მას ედავება მიხეილ კალანდიაზე ზეწოლას. ზაალ თავაძე აცხადებს, რომ წარსადგენ ბრალდებას არ აღიარებს მორჩაძე.

შსს-ს ინფორმაციით, მორჩაძის დაკავება მკვლელობის ძირითადი საქმიდან გამოყოფილი იმ სისხლის სამართლის საქმის ფარგლებში განხორციელდა, რომელზეც გამოძიებას შინაგან საქმეთა სამინისტრო აწარმოებს. შსს ამ ეტაპზე არ აკონკრეტებს ვისზე განხორციელებული შესაძლო ზეწოლის ბრალდებით დააკავეს მერაბ მორჩაძე.