ხაშურის მე-4 საჯარო სკოლის 300 მოსწავლე, რომლებსაც 5 წელია ახალი შენობა ვერ აუშენეს, მე-7 სკოლიდანაც ასახლებენ. ამის შესახებ ინფორმაციას "ქართლის ამბები" ავრცელებს. მათივე ცნობით, სასწავლო პროცესი დროებით პირველ საჯარო სკოლაში გაგრძელდება,

ბავშვები და მოზარდები საორგანიზაციო საკითხების მოგვარებამდე, დროებით ონლაინ სწავლებაზე გადავიდნენ.

"დროებით ონლაინ სწავლებაზე გადავედით, მანამდე, სანამ მე-7 საჯარო სკოლიდან ავეჯს გადმოვიტანთ. მივიღეთ გადაწყვეტილება, რომ, ვინაიდან მე-7 სკოლა თავადაც სარემონტოა, პირველ საჯარო სკოლაში გადავიდეთ.

ამ ეტაპზე ავეჯის გადმოტანის პროცესი მიმდინარეობს. ის ავეჯი, რომელიც მე-7 სკოლაში გადავიტანეთ, უნდა შევინახოთ, რადგან პირველ სკოლას საკმარისი რაოდენობის მერხები აქვს.

დღეს მერიამ ტრანსპორტი გამოგვიყო და უახლოეს დღეებში დავლაგდებით, რის შემდეგაც სწავლა ისევ სკოლაში გაგრძელდება. ძალიან თბილად და გაგებით დაგვხვდა პირველი საჯარო სკოლის დირექტორი მორისი და არანაირი პრობლემა აღარ იქნება, გველოდებიან.

ამ ეტაპზე სკოლაში 300 მოსწავლე გვყავს", — თქვა ხაშურის მე-4 საჯარო სკოლის დირექტორმა ნანა გაგნიძემ.

ცნობისთვის, ხაშურის მე-4 საჯარო სკოლა 2021 წლიდან სასწავლო პროცესს მე-7 საჯარო სკოლის შენობაში აგრძელებდა.

"ქართლის ამბები" წერს, რომ 18 სექტემბრიდან ხაშურში მე-5 საჯარო სკოლის მოსწავლეებს დაატოვებინეს შენობა. მათ მე-8 სკოლაში გადაიყვანენ, მანამდე კი ისინიც ონლაინ რეჟიმში გააგრძელებენ სწავლებას.

შეგახსენებთ, სკოლის დაწყებიდან 2 დღეში თბილისის 21-ე საჯარო სკოლის მოსწავლეებსაც განუცხადეს, რომ ისინი შენობაში სწავლის გაგრძელებას ვერ შეძლებდნენ, ვინაიდან სკოლა ავარიულია და უნდა დაინგრეს. აღნიშნულს მოსწავლეების პროტესტი მოჰყვა.