დამამძიმებელ გარემოებაში დავით სარალიძის განზრახ ჯგუფურად მკვლელობაში ბრალდებულ მიხეილ კალანდიას ბრალი ოფიციალურად წარედგინა. კალანდიას ადვოკატის თქმით, ის თავს დამნაშავედ არ ცნობს.

ადვოკატის, ანი კეკენაძის თქმით, საქმეში არსებული მტკიცებულებები ძველი ჩვენებებია და ახალი არაფერი არ არის.

მისივე განცხადებით, ბრალში დაფიქსირებულია, რომ ინციდენტის დროს ის ფლობდა ბასრ საგანს.

კანონის შესაბამისად საქალაქო სასამართლოში პროცესი უნდა ჩაინიშნოს და კალანდიას აღმკვეთი ღონისძიების საკითხი უნდა განიხილონ.

2017 წლის პირველ დეკემბერს ხორავას ქუჩის კონფლიქტის თანამონაწილე, მიხეილ კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით დღეს, 4 ივნისს დააკავეს. ერთი დღით ადრე, 3 ივნისს ამავე საქმეზე სააპელაციო სასამართლოს განაჩენი დადგა. სააპელაციომ განაცხადა, რომ დავით სარალიძე ბრალდებულმა გ.ჯ.-მ დაუდგენელ პირებთან ერთად მოკლა. გუშინვე შსს მინისტრმა, გიორგი გახარიამ განაცხადა, რომ სასამართლოს დასაბუთებულ გადაწყვეტილებას "ყურადღებით წაიკითხავდნენ" და "სწრაფად იმოქმედებდნენ".

შინაგან საქმეთა სამინისტროში განაცხადეს, რომ პირველი ინსტანციის განაჩენის შემდეგ მათ მოიპოვეს მტკიცებულებები, რომლებიც მკვლელობაში კალანდიას თანამონაწილეობის ეჭვს ამყარებდა.

"სააპელაციო სასამართლოს 2019 წლის 3 ივნისის გადაწყვეტილებამ, რომლითაც გ.ჯ. ცნობილ იქნა დამნაშავედ დავით სარალიძის ჯგუფურად მკვლელობაში, კიდევ ერთხელ დაადასტურა გამოყოფილი საქმის ფარგლებში შინაგან საქმეთა სამინისტროს მიერ ჩატარებული გამოძიების სისწორე, გამოძიებას გაუმყარა პოზიცია და შექმნა დამატებითი მტკიცებულებითი საფუძველი დავით სარალიძის მკვლელობაში მ.კ.-ს თანამონაწილეობის შესახებ", — აღნიშნეს შსს-ში.

გამოძიება სისხლის სამართლის კოდექსის 109-ე მუხლის მე-2 ნაწილის "ბ" და "ე" ქვეპუნქტებით მიმდინარეობს, რაც ჯგუფურად, დამამძიმებელ გარემოებებში, დამნაშავისათვის წინასწარი შეცნობით არასრულწლოვნის ან უმწეო მდგომარეობაში მყოფის მიმართ ჩადენილი მკვლელობა.