ყავის მოყვარულებს შეუძლიათ, შვებით ამოისუნთქონ - ახალი კვლევის თანახმად, თუნდაც დიდი რაოდენობით ყავა არტერიულ სისტემას არ ვნებს.

აქამდე ყავასთან დაკავშირებით ურთიერთგამომრიცხავი ცნობები ვრცელდებოდა: ზოგიერთი კვლევა მის სარგებლიანობაზე მეტყველებდა, სხვა მკვლევრები კი გვირჩევდნენ, ყავის რაოდენობა მკვეთრად შეგვემცირებინა. არსებობდა აზრი, რომ ყავა არტერიების ელასტიურობას ამცირებდა, რაც გულის შეტევის რისკს ზრდიდა.

ბრიტანეთის გულის საზოგადოების მიერ ჩატარებული კვლევით ეს აზრი არ დასტურდება. 8 000-ზე მეტი ადამიანზე დაკვირვებით დადგინდა, რომ ისინი, ვინც 25 ჭიქას სვამენ დღეში, გულის შეტევის რისკის ქვეშ იმაზე მეტად არ დგანან, ვიდრე ადამიანები, რომლებიც ერთ ჭიქაზე ნაკლებს სვამენ.

კვლევის მონაწილეების გულის მდგომარეობას მეცნიერები პულსის ინფრაწითელი ტესტებითა და მაგნიტორეზონასული ტომოგრაფიით აკვირდებოდნენ. გათვალისწინებული იყო ასევე სხვა ფაქტორები: ასაკი, სქესი, წარმომავლობა, სიგარეტთან დამოკიდებულება, წონა, წნევა, კვების რაციონი და ა.შ.

მიუხედავად იმისა, რომ გამოკითხულ ადამიანებს შორის ზოგიერთი 25 ჭიქა ყავას სვამდა, ყავის მოხმარების საშუალო მაჩვენებელი 5 ჭიქა იყო.

"მთავარი გზავნილი, რაც ამ კვლევიდან გამოვიტანეთ ისაა, რომ ყავა შეიძლება ჯანსაღი ცხოვრების წესის ნაწილი იყოს და ყავის მოყვარულებს შეუძლიათ, გულის მდგომარეობაზე აღარ იდარდონ", - ამბობს კენეტ ფუნგი, ლონდონის უნივერსიტეტის ანალიტიკოსი, - "რა თქმა უნდა, ეს იმას არ ნიშნავს, რომ 25 ჭიქა უნდა დალიოთ. თუ რეკომენდებულ რაოდენობას დაიცავთ, არანაირი გართულება არ გექნებათ".

ასე რომ, ამ სტატიის შემდეგ თამამად შეგიძლიათ დაისხათ ყავა. მეცნიერებიც თანხმდებიან, რომ ამით არაფერი დაგიშავდებათ.