პრეზენტაციიდან 18 წლის შემდეგ Apple იმ პროგრამას ემშვიდობება, რომლითაც "მუსიკის რევოლუცია" დაიწყო. iTunes, რომელიც mp3 მუსიკის ერაში შეუცვლელი სერვისი იყო, თითქმის ორი დეკადის თავზე უქმდება.

ეს სიახლე მოულოდნელი არაა. უკვე წლებია, რაც სტრიმინგ სერვისებმა (მათ შორის, Apple Music-მა) ჩამოტვირთვის ფორმატი ჩაანაცვლა. 2018 წლის მონაცემებით, მუსიკალური ინდუსტრიის შემოსავლების 75% სტრიმინგზე მოდის.

iTunes 2001 წელს გაეშვა და მუსიკალური ინდუსტრიის ერთ-ერთ მთავარ პრობლემასთან, პირატულ მოხმარებასთან ბრძოლაში ჩაება. მას შემდეგ ის მედია-გიგანტად იქცა და მუსიკა, ფილმები და ტელევიზია გააერთიანა.

ეფლი iTunes-ს სამი დამოუკიდებელი აპლიკაციით: მუსიკით, ტელევიზიითა და პოდკასტებით ანაცვლებს. კომპანიამ მედიის დეცენტრალიზაცია აიპადებსა და აიფონებზე უკვე განახორციელა. ახლა კი მაკებისა და მაკბუქების დროც დადგა.

"ამ ნაბიჯით Apple საკუთარ თავს გართობის სერვისების პროვაიდერად წარმოაჩენს და არა უბრალოდ ტექ-კომპანიად, რომელიც თავის რამდენიმე აპლიკაციაში მედიას ყიდის", - წერს Rolling Stone's-ის მიმომხილველი.

Apple Music-ის აპლიკაცია iTunes-ის რამდენიმე ძირითად ფუნქციას შეითავსებს, მათ შორის, სიმღერის შეძენასა და ტელეფონთან სინქრონიზაციას. მიუხედავად იმისა, რომ iTunes-ის გაუქმება ეპოქის დასასრულს ნიშნავს, მომხმარებლებისთვის ისიც ცხადია, რომ თანამედროვე სამყაროში ეს ნაბიჯი გარდაუვალი იყო.

ეფლის ოპერაციული სისტემის განახლებული ვერსია, macOS Catalina გუშინ გამოვიდა და მასში iTunes ხელმისაწვდომი უკვე აღარ არის.