თბილისის მერი დავით ნარმანია და მერის მოადგილეები - ნინა ხატისკაცი, გიგა ნიკოლეიშვილი და ნატო ქიტიაშვილი სამსახურში ავტომანქანის გარეშე მივიდნენ. ინფორმაციას ამის შესახებ მერიის პრესსამსახური ავრცელებს. უწყების ცნობით, ამ ნაბიჯით თბილისის მერია 22 სექტემბრის საერთაშორისო აქციას “დღე მანქანის გარეშე“ შეუერთდა.

პრესსამსახურის ინფორმაციით, დავით ნარმანიამ განაცხადა, რომ "თბილისის მერია სიამოვნებით ერთვება აქციაში, რომელიც ქალაქის ეკოლოგიასა და, ასევე, ჯანსაღი ცხოვრების პოპულარიზაციაზე ზრუნვას გულისხმობს. მისი თქმით, დღეს ტრანსპორტი შედარებით შემცირებულია, რაც აქციას ამართლებს და მისი შემდგომ წლებშიც ჩატარების საჭიროებას უსვამს ხაზს".

თბილისში საერთაშორისო აქცია „დღე მანქანის გარეშე“ დღეს პირველად აღინიშნება.

დატოვეთ საკუთარი ავტომობილები სახლში ერთი დღით, იარეთ ფეხით ან საზოგადოებრივი ტრანსპორტით, რათა ხელი შეუწყოს დედაქალაქში ჯანსაღი გარემოს შექმნას - ეს არის აქციის მთავარი გზავნილი, რომელიც, მრავალი წელია, მსოფლიოს ბევრ დიდ ქალაქში იმართება.

ავტომობილის გარეშე დღის გატარების ტრადიციას საფუძველი 1997 წელს ინგლისში ჩაეყარა. ერთი წლის შემდეგ ინიციატივას შეუერთდა საფრანგეთი. წელს ეს დღე ყველაზე მასშტაბურად აღინიშნება - მას 51 ქვეყანა და 2 ათასზე მეტი ქალაქი უერთდება.

ქონებრივი დეკლარაციის მიხედვით, თბილისის მერი საბურთალოზე, სპორტის სასახლის მიმდებარედ, ბერბუკის ქუჩაზე ცხოვრობს, რაც თბილისის მერიიდან, ანუ მისი სამუშაო ადგილიდან დაახლოებით 1 კილომეტრით არის დაშორებული.