ეკონომიკის ახალი მინისტრი ნათია თურნავა აცხადებს, რომ 2012 წელს მისი სახელით ნაციონალური მოძრაობისთვის შეწირული 35 000 ლარი მისი ფული არ ყოფილა. მინისტრის თქმით, ამ პარტიის შემწირველი არ არის და ეს "ტექნიკური ტრანზაქცია" იყო.

"იმ დროს რა კომპანიაშიც ვმუშაობდი რამდენიმე მაღალი რანგის მენეჯერის ანგარიში იყო გამოყენებული ამ ტრანაქციისთვის", — განაცხადა თურნავამ იმედი LIVE-ის ეთერში.

მინისტრმა არ უპასუხა კითხვას, მისგან დაუკითხავად გადაირიცხა თუ არა თანხა. განაცხადა, რომ საუბარია ერთ კონკრეტულ ტრანზაქციაზე და ჟურნალისტებს მოუწოდა გაანალიზონ რატომ ხდებოდა მსგავსი ფაქტები.

მსგავსი განცხადება გაავრცელა 2018 წელს პრემიერ-მინისტრმა მამუკა ბახტაძემაც, როცა გაირკვა, რომ მას ნაციონალური მოძრაობისთვის 20 000 ლარი აქვს შეწირული. მინისტრმა განაცხადა, რომ ის 2011 წლიდან ქართული ოცნების მხარდამჭერია და მისი პირად ანგარიში გადარიცხვისთვის ტექნიკურად გამოიყენეს.

ნათი თურნავა ეკონომიკის მინისტრად 18 აპრილს მას შემდეგ დაინიშნა, რაც პრემიერი-მინისტრმა ყოფილი მინისტრის, გიორგი ქობულიას გადაყენების ბრძანებას ხელი მოაწერა. თურნავა ქობულიას მოადგილედ მუშაობდა.

ვინ არის ნათია თურნავა

ნათია თურნავა ეკონომიკის მინისტრის მოადგილედ 2018 წლის სექტემბერში დაინიშნა. მანამდე კი ის საპარტნიორო ფონდის აღმასრულებელი დირექტორის მოადგილედ მუშაობდა.

2006-2013 წლებში ნათია თურნავა საქართველოს ინდუსტრიული ჯგუფისდირექტორთა საბჭოს წევრი, საქართველოს საერთაშორისო ენერგეტიკული კორპორაციის გენერალური დირექტორი და დირექტორთა საბჭოს თავმჯდომარე იყო.

ეკონომიკის მინისტრის პირველ მოადგილედ ნათია თურნავა მუშაობდა 2000-2005 და 2005-2006 წლებში. გარდა ამისა, 2005 წელს ის საქართველოს პრეზიდენტთან არსებული უშიშროების საბჭოს მდივნის მოადგილე იყო.

მანამდე, 1998-2000 კი თურნავა თბილისის საკრებულოს წევრი და საკრებულოს საფინანსო-საბიუჯეტო კომისიის თავმჯდომარის მოადგილე იყო.

განათლებით ნათია თურნავა ეკონომისტია და ბაკალავრი თბილისის სახელმწიფო უნივერსიტეტში დაამთავრა. ამავე უნივერსიტეტში გაიარა ასპირანტურა. სამაგისტრო პროგრამა დიდი ბრიტანეთის კუმბრიის საგრაფოს უნივერსიტეტში დაასრულა და ბიზნეს ადმინისტრირების სამაგისტრო ხარისხი მიენიჭა. არის 40-მდე სამეცნიერო ნაშრომის, სტატიის და მონოგრაფიის ავტორი, ორი წიგნის თანაავტორი.