ბავარიის რეგიონულმა სასამართლომ 11-დღიანი პროცესის შემდეგ მიხეილ ბინიაშვილს, რომელიც მასშტაბური საერთაშორისო თაღლითური სქემის ერთ-ერთ ცენტრალურ ფიგურად მიიჩნევა განაჩენი გამოუტანა. სასამართლომ მას 7 წლით და 6 თვით თავისუფლების აღკვეთა მიუსაჯა. ინფორმაციას" ფლანგვის დეტექტორი" ავრცელებს.

სასამართლოს დადგენილებით, ბინიაშვილი 2017-2019 წლებში ალბანეთში ბაზირებულ ქოლ-ცენტრს ხელმძღვანელობდა, სადაც 600-მდე ადამიანი იყო დასაქმებული. სქემა შემდეგნაირად მუშაობდა:

დაზარალებულები რეგისტრირდებოდნენ ყალბ საინვესტიციო პლატფორმებზე.
"სპეციალურად მომზადებული პერსონალი" მათგან ნდობის მოპოვებასა და დიდი თანხების გამოძალვას ახერხებდა.

გამოძიების მიხედვით, პირდაპირმა ზარალმა 8 მილიონი ევრო შეადგინა, თუმცა ბინიაშვილს ასევე ბრალი ედება სხვა დაჯგუფებებისთვის პროგრამული უზრუნველყოფის მიწოდებაში, რამაც ჯამური ზიანი დამატებით 42 მილიონ ევრომდე გაზარდა.

ბინიაშვილი პასუხისმგებელი იყო სპეციალიზებული პროგრამის, PumaTS-ის შექმნასა და გავრცელებაზე. ეს პროგრამული უზრუნველყოფა თაღლითური ინფრასტრუქტურის ხერხემალი იყო, რომელსაც ის სხვა კრიმინალურ ჯგუფებზეც ყიდდა. ორგანიზებული დანაშაულისა და კორუფციის შესახებ ანგარიშგების პროექტის (OCCRP) გამოძიებით, სწორედ ამ პროგრამას იყენებდა საქართველოში მოქმედი ქოლ-ცენტრიც.

როგორც ფლანგვისდეტექტორი წერს, სასამართლო პროცესი გამკაცრებული უსაფრთხოების ზომების ფართობზე ჩატარდა. ბინიაშვილმა ბრალი აღიარა.

"ბრალდებულმა სრულად აღიარა ბრალი სასამართლო პროცესის დროს საპროცესო შეთანხმების ფარგლებში და საბოლოო სიტყვაში ბოდიში მოუხადა დაზარალებულებს", — აღნიშნულია ოფიციალურ განცხადებაში.

საპატიმრო ვადის გარდა, მას ჩამოერთვა თაღლითური გზით მოპოვებული 2.4 მლნ ევრო. განაჩენი ამ ეტაპზე საბოლოო არ არის და მსჯავრდებულს მისი გასაჩივრების უფლება აქვს.