კომპანია "მეამა" სოციალურ ქსელში სამთავრობო პროპაგანდისტულ ტელევიზიებთან "იმედთან" და "პოსტვ"-ისთან თანამშრომლობასთან დაკავშირებით განცხადებას ავრცელებს. მათი განმარტებით, კომპანიას "არ უთქვამს უარი საქართველოში ყველაზე რეიტინგულ ტელევიზიებთან" თანამშრომლობაზე. "მეამა" უარყოფს მანამდე გავრცელებულ ინფორმაციას იმის შესახებ, რომ სანქცირებულ ანგარიშებზე თანხას არ გადარიცხავდა.

მათივე განმარტებით, "ჩვეულ რეჟიმში გაგრძელდება რეკლამის განთავსება ორივე ხსენებული ტელევიზიის ეთერში".

"გვსურს გავაკეთოთ განმარტება ჩვენ კომპანიასთან დაკავშირებით აგორებულ ცრუ კამპანიაზე. ხაზგასმით აღვნიშნავთ, რომ კომპანიას არ უთქვამს უარი საქართველოში ყველაზე რეიტინგულ ტელევიზიებთან, "ტვ იმედთან" და "პოსტ"-ისთან თანამშრომლობაზე.

კონკრეტული მედიის მხრიდან იყო დასმული შეკითხვა, მოხდებოდა თუ არა ჩვენი კომპანიის მხრიდან სანქცირებულ ანგარიშზე თანხის გადარიცხვა, რაზეც იყო გაცემული კონკრეტული პასუხი, რომ მსგავსი ტრანზაქცია ვერ განხორციელდებოდა.

ჩვენი კომპანიისათვის მნიშვნელოვანია რეკლამა განთავსდეს ყურებად მედიასაშუალებებში, რის გარეშეც შესაძლებელია კომპანიამ მნიშვნელოვანი ფინანსური ზიანი მიიღოს, ამიტომ ჩვეულ რეჟიმში გაგრძელდება რეკლამის განთავსება ორივე ხსენებული ტელევიზიის ეთერში", — წერია კომპანიის განცხადებაში.

ცნობისთვის, 28 თებერვალს, "მეამას" დირექტორმა ლაშა შარიქაძემ, "ფორმულას" ჟურნალისტს უთხრა, რომ არ აპირებს სანქცირებულ კომპანიებთან თანამშრომლობას.

შეგახსენებთ, დიდმა ბრიტანეთმა სამთავრობო პროპაგანდისტული ტელევიზიები " იმედი" და "პოსტვ" 24 თებერვალს დაასანქცირა.