ოთხწლიანი ლოდინის შემდეგ, სამხრეთკორეული ჯგუფი BTS გულშემატკივრებს ახალი მუსიკითა და მსოფლიო ტურნეთი უბრუნდება.

თუკი მოვლენებს ოდნავ ჩამორჩით, შეგახსენებთ, რომ 2022 წლის დეკემბერში ჯგუფის წევრები — RM, შუგა, V, ჯიმინი, ჯანგკუკი, ჯინი და J-Hope — სამხედრო სამსახურში გაიწვიეს. ჯინი იყო პირველი, რომელიც 2022 წლის დეკემბერში გაიწვიეს, მოგვიანებით მას J-Hope შეუერთდა. საბოლოო ჯამში, 2023 წლისთვის ჯგუფის ყველა წევრი სავალდებულო სამხედრო სამსახურში იმყოფებოდა.

კორეული პოპის ერთ-ერთი ყველაზე ცნობილი ჯგუფი — BTS

ფოტო: HYBE

საბედნიეროდ, BTS-ის წევრები გასულ წელს ეტაპობრივად დაითხოვეს სამხედრო სამსახურიდან. გასული წლის ივნისში ჯინი, შემდეგ RM და V დაბრუნდნენ სამხედრო სამსახურიდან, მოგვიანებით კი მათ ჯანგკუკი, ჯიმინი და შუგა შეუერთდნენ.

როდის მოვისმენთ BTS-ის ახალ ალბომს?

როგორც სამხრეთკორეულმა ჯგუფმა გასულ წელს დააანონსა, მსმენელები ახალ ალბომს 2026 წლის 20 მარტს მოისმენენ.

ფოტო: Getty Images

"ალბომი, რომელიც სულ 14 სიმღერისგან შედგება, თითოეული წევრის გულწრფელი თვითრეფლექსიით არის შთაგონებული", — ვკითხულობთ პრესრელიზში.

ახალ ალბომზე ჯერჯერობით მხოლოდ ის ვიცით, რომ მასში 14 სიმღერაა შესული და ჯგუფის წევრებმა გასული წლის მეორე ნახევარი სრულად Arirang-ს მიუძღვნეს.

როდის იწყება BTS-ის მსოფლიო ტურნე?

ახალ ალბომზე საუბართან ერთად, K-Pop ჯგუფმა მსოფლიო ტურნეს დაანონსებაც არ დააყოვნა.

ფოტო: FLICKR/YUN_Q

როგორც ცნობილია, ტურნე 2026 წლის 9 აპრილს სამხრეთ კორეაში დაიწყება და 2027 წლის მარტში ფილიპინებში ჩატარებული კონცერტით დასრულდება. მსოფლიო ტურნე მოიცავს როგორც სამხრეთ ამერიკის, ისე აზიის, ევროპისა და ჩრდილოეთ ამერიკის ქვეყნებს.

BTS-ის წევრებმა ასევე აღნიშნეს, რომ 2027 წელს კიდევ რამდენიმე კონცერტს ჩაატარებენ, თარიღებს კი მალე გავიგებთ. სანამ სამხრეთკორეული ჯგუფის გულშემატკივრები ახალ ალბომს მოისმენთ, შეგიძლიათ, ჯგუფის სიმღერებს კიდევ ერთხელ გადაავლოთ თვალი.