გახსოვთ, კემბრიჯის უნივერსიტეტის ლექტორმა სტუდენტებს რომ ურჩია, ლათინური ენის შესასწავლად ტეილორ სვიფტის სიმღერები გამოეყენებინათ? როგორც აღმოჩნდა, ამერიკელი მომღერალი სწავლის პროცესში მხოლოდ სტუდენტებს როდი უწევს კარგ სამსახურს...

ტეილორ სვიფტის მუსიკაზე მილენიალების მთელი თაობა გაიზარდა, თუმცა, სუპერვარსკვლავი დღევანდელ მოზარდებსაც ისე უყვართ, რომ, როგორც ჩანს, მეცადინეობის დროსაც ვერ ელევიან. ყოველ შემთხვევაში, ამაზე მიუთითებს უახლესი კვლევა, რომლის ფარგლებშიც ათასზე მეტი მშობელი გამოიკითხა.

გამოკითხვის შედეგად, დადგინდა, რომ სასკოლო დავალებების შესრულების პროცესში მოსწავლეები ყველაზე ხშირად სწორედ ტეილორ სვიფტს უსმენენ. მშობლები ასევე მიუთითებდნენ, რომ მუსიკის თანხლებით მეცადინეობა მოზარდების აკადემიურ მოსწრებაზე დადებითად აისახებოდა: ბავშვებს უმცირდებოდათ სტრესი და დავალებებსაც ნაკლებად აღიქვამდნენ რთულ საქმედ.

კვლევის მიხედვით, მუსიკის მოსმენას დიდი როლის შესრულება შეუძლია სწავლის პროცესში. გამოკითხული მშობლები აღნიშნავენ, რომ მუსიკა მათ შვილებს დიდხანს კონცენტრირებაში ეხმარება, ამასთან, ავსებს მოტივაციით და დავალებებთან დაკავშირებულ შფოთვასაც უმსუბუქებს. მკვლევრები კი ასკვნიან, რომ როცა მოსწავლეები ნაკლებად შფოთავენ, მეტი მოწადინებით იწყებენ საქმის შესრულებას და უფრო დიდხანსაც მუშაობენ. ამდენად, მუსიკა ემოციურ მხარდაჭერას უზრუნველყოფს და ხანგრძლივ სამუშაოსაც კი ნაკლებად სტრესულს და მეტად დაძლევადს ხდის.

ცხადია, სწავლის პროცესში მუსიკის ინტეგრირება ყველა მოზარდისთვის განსხვავებულია: ზოგს ე.წ. ფონური მუსიკა და ინსტრუმენტული ვერსიები ურჩევნია, რადგან ტექსტის მოსმენა ყურადღებას უფანტავს.

რაც შეეხება ჟანრობრივ მხარეს, აღმოჩნდა, რომ მოსწავლეების უმრავლესობა პოპმუსიკას ანიჭებს უპირატესობას; მას მოსდევს როკი და ჰიპ-ჰოპი.

თუმცა, კვლევა ცალსახად მიუთითებს, რომ ტეილორ სვიფტი ყველა ასაკობრივ კატეგორიაში განსაკუთრებული პოპულარობით სარგებლობს. უცნობია, რა ხდის სვიფტის სიმღერებს ასე გამორჩეულს მეცადინეობისთვის, მაგრამ მკვლევრების დასკვნის თანახმად, შესაბამისი შედეგის მისაღებად, მნიშვნელოვანია, მოსწავლეს მოსწონდეს ის მუსიკა, რომელსაც უსმენს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...