საქართველოს პრემიერ-მინისტრობის კანდიდატის მამუკა ბახტაძის განცხადებით, მას 20 000 ლარი ნაციონალური მოძრაობისთვის არ შეუწირავს.

მისივე თქმით, ის 2011 წლიდან ქართული ოცნების მხარდამჭერია და მისი პირად ანგარიში გადარიცხვისთვის ტექნიკურად გამოიყენეს.

"არა, მე ჩემი თანხა არასდროს არ გადამირიცხავს ნაციონალური მოძრაობისთვის. თქვენ, 2012 წელს, იმიტომ რომ არ ჰქონოდა საშუალება ქართულ ოცნებას დაეფინანსებინა პარტია შეცვალეთ კანონი და იურიდიულ პირებს აუკრძალეთ პარტიების დაფინანსება, ამას მოყვა ცვლილება კანონში. ჩემი პირადი, ფიზიკური ანგარიში იქნა გამოყენებული მხოლოდ ტექნიკურად. 2011 წლიდან ვიყავი და ვარ ქართული ოცნების მხარდამჭერი, 2012 წელს ვიყავი დაკავებული ძალიან მნიშვნელოვანი საორგანიზაციო საკითხებით და 2012 წლის პირველ ოქტომბერს ვიზეიმე თქვენი გასტუმრება საქართველოს ხელისუფლებისგან", - განაცხადა მამუკა ბახტაძემ ნაციონალური მოძრაობის დეპუტატის თინათინ ბოკუჩავას კითხვის საპასუხოდ.

დეპუტატი თინა ბოკუჩავა პრემიერ-მინისტრობის კანდიდატის პასუხს გამოეხმაურა და პასუხის დაზუსტება ითხოვა.

"თქვენ ადასტურებთ, რომ 20 000 ლარის გადარიცხვა დაგავალათ თქვენმა იმდროინდელმა დამსაქმებელმა? თქვენ,როცა ხვალ პრემიერ-მინისტრი იქნებით, რუსეთმა რომ დაგაძალოთ ოკუპირებული ტერიტორიების აღიარება, ან ბიძინა ივანიშვილმა დაგაძალოთ კრიმინალზე ხელის დაფარება, გააკეთებთ ამას ბატონო მამუკა? თუ ასე მყიფე ბრძანდებით, არ მგონია, რომ საქართველოს პრემიერ-მინისტრის პოსტზე შესაფერისი კანდიდატი ხართ", - განაცხადა თინა ბოკუჩავამ.

სახელმწიფო აუდიტის სამსახურის ინფორმაციით, მამუკა ბახტაძემ 2012 წელს ერთიან ნაციონალურ მოძრაობას 20 ათასი ლარი შესწირა.