ქართული ცეკვების ანსამბლი გორდა ისრაელში არ შეუშვეს. საქართველოს საგარეო საქმეთა სამინისტროს განცხადებით, მესაზღვრეებისათვის საეჭვო გახდა ის გარემოება, რომ ანსამბლი ისრაელში მიდიოდა საბავშვო ფესტივალზე მონაწილეობის მიზნით და ანსამბლის 17 წევრიდან მხოლოდ 5 იყო ბავშვი, დანარჩენი კი 25 წლის ზემოთ პირები.

საგარეო უწყების ცნობით, ისრაელში საქართველოს კონსული ესაუბრა ჯგუფის ხელმძღვანელს. ისრაელის მხარე თანახმა იყო მიეცათ შესაძლებლობა საქართველოს მოქალაქეებისათვის შეეძინათ ბილეთები საქართველოში დასაბრუნებელ უახლოეს რეისზე. თუმცა მშობლებმა აღნიშნულ შეთავაზებაზე უარი განაცხადეს. კომპანია myway-ის, რომლითაც ანსამბლის წევრები ჩავიდნენ ისრაელში, თბილისში უახლოესი რეისი 17 აპრილს 13:30 საათზე აქვს.

"საქართველოს კონსული გაემგზავრა აეროპორტის წინასწარი განთავსების დაწესებულებაში საქართველოს მოქალაქეების მოსანახულებლად. ასევე კონსული უკვე ესაუბრა სადეპორტოს ადმინისტრაციას და თხოვა განსაკუთრებით ყურადღებით იყვნენ ბავშვებთან მიმართებით. აღსანიშნავია, რომ 5 ბავშვიდან 3-ს თან ახლავს ორივე მშობელი, მხოლოდ ორი ბავშვია მშობლის გარეშე", — ნათქვამია საგარეო საქმეთა სამინისტროს განცხადებაში.