ფინანსთა სამინისტროს საგამოძიებო სამსახურის განცხადებით, დიდი ოდენობით სხვისი ქონების მოტყუებით დაუფლების მცდელობის ბრალდებით ერთი პირი დააკავეს. უწყების ინფორმაციით, ბრალდებული დაუკავშირდა პირს, რომელსაც დამატებითი ღირებულების გადასახადში (დღგ) ერიცხებოდა ზედმეტობა 112 000 ლარის ოდენობით და უთხრა, რომ მაღალი რანგის მოხელის მეშვეობით, ამ თანხას განაღდებაში დაეხმარებოდა.

უწყებაში ამბობენ, რომ ბრალდებულმა ამ საქმისთვის 35 000 ლარი მოითხოვა, საიდანაც 20 000 წინასწარ აიღო. მათი თქმით, სწორედ ამ დროს დააკავეს ის.

საქმეზე გამოძიება საქართველოს სისხლის სამართლის კოდექსის 19-180-ე მუხლის მესამე ნაწილით მიმდინარეობს, რაც სასჯელის სახით ითვალისწინებს თავისუფლების აღკვეთას 6-დან 9-წლამდე ვადით.