ამერიკის შეერთებული შტატების პრეზიდენტმა, დონალდ ტრამპმა განაცხადა, რომ "რუსეთი უნდა გაეთრიოს ვენესუელიდან". ამის შესახებ მან პრესკონფერენციაზე ისაუბრა, რომელსაც ვენესუელის აღიარებულ პრეზიდენტ, ხუან გუაიდოს ცოლთან ერთად მართავდა.

ჟურნალისტების კითხვაზე, გადასცეს თუ არა ტრამპის პოზიცია მისმა წარმომადგენლებმა რუსეთში ოფიციალურ პირებს ის პასუხობს: "მათ ძალიან კარგად იციან". მანვე აღნიშნა, რომ რუსული ჯარების ვენესუელიდან გასაყვანად "ყველა ვარიანტი ღიაა".

ფოტო: Carlos Berria / Reuters

რამდენიმე დღის წინ რუსულმა მედიამ გაავრცელა ინფორმაცია, რომ ორი რუსული თვითმფრინავი რუს სამხედროებთან ერთად კარაკასის აეროპორტში ჩავიდა. 2018 წლის დეკემბერში რუსეთმა ვენესუელაში ორი მომბდამშენი TU-160 გააგზავნა. ამ წლის იანვარში ინფორმაცია გავრცელდა, რომ პრეზიდენტ ნიკოლას მადუროს დასაცავად კერძო რუსი სამხედროებიც ჩავიდნენ.

ვენესუელის ეროვნული ასამბლეის თავმჯდომარემ, ხუან გუაიდომ ქვეყნის დროებით პრეზიდენტად თავი 24 იანვარს გამოაცხადა. ხუან გუაიდოს მხარდაჭერას უცხადებენ ლათინური ამერიკისა და ევროპის ქვეყნების დიდი ნაწილი, მათ შორის, საქართველო და აშშ.

ნიკოლას მადუროს კი მის მიერვე შექმნილი კონსტიტუციური ასამბლეა და ჯარი უჭერენ მხარს. მის ლეგიტიმურობას აღიარებენ რუსეთი, ჩინეთი, თურქეთი, ირანი, კუბა და აფხაზეთისა და სამხრეთ ოსეთის დე ფაქტო რესპუბლიკები.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა.

საერთაშორისო ულტიმატუმის მიუხედავად ნიკოლას მადურო ვადამდელი არჩევნების ჩატარებას არ აპირებს.