სპეციალური პენიტენციური სამსახურის გენერალურმა დირექტორმა გიორგი პატარიძემ ქონებრივი დეკლარაცია მიმდინარე წლის ივნისში შეავსო.

დეკლარაციის მიხედვით, პატარიძე მხოლოდ 2007 წელს 11 536 ლარად ნაყიდ ბინას ფლობს თბილისში (82,4 კვ.მ).

პენიტენციური სამსახურის გენდირექტორის დეკლარაციის თანახმად, მას არც ავტომობილი, არც ანაბრები, არც საჩუქრები და ნაღდი ფული არ აქვს. ხარჯებში კი, შვილის - მარიამ პატარიძის სწავლის საფასური - 8500 ლარი აქვს მითითებული.

რაც შეეხება ანაზღაურებას, გიორგი პატარიძეს გენდირექტორის პოსტზე 2025 წლის 22 აგვისტოდან დეკემბრის ბოლომდე 48 712,12 ლარი აქვს აღებული. მანამდე ის ჯანდაცვის მინისტრის მოადგილის თანამდებობაზე იყო, რომელზეც 2025 წლის იანვრიდან აგვისტომდე 66 291,07 ლარი აქვს აღებული ხელფასის სახით.

მის მეუღლეს ლანა კილასონიას კი, შპს ინტერავიაში კორპორატიული გაყიდვების უფროსის პოზიციაზე 2025 წლის განმავლობაში 51 575,02 ლარის ხელფასი აქვს მიღებული.

რაც შეეხება საბანკო ანგარიშებს, დეკლარაციის შევსებისას, გიორგი პატარიძეს მხოლოდ 12,71 ლარი ჰქონდა, მის მეუღლეს - 775 ლარი და დეპოზიტზე - 10 000 ლარი.

ცნობისთვის, გიორგი პატარიძე სპეციალური პენიტენციური სამსახურის უფროსად გასული წლის აგვისტოში დაინიშნა. მანამდე ის 2024 წლიდან ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე იყო.

გიორგი პატარიძის სამუშაო გამოცდილება:

2005-2006 წლები — "საქართველოს რეკონსტრუქციისა და განვითარების კომპანია", კორპორატიული მართვის მენეჯერი;

2006–2010 წლები — "საქართველოს რეკონსტრუქციისა და განვითარების კომპანია", სახელმწიფო სტრუქტურებთან ურთიერთობებისა და უძრავი ქონების შესყიდვების დირექტორი;

2009-2011 წლები — შპს "ალიანს ლოჯისტიკ ჯორჯია", დირექტორი საოპერაციო დარგში;

2011-2013 წლები — შპს "პროდ-იმპორტი", დირექტორი საოპერაციო დარგში;

2011-2013 წლები — შპს "კრისტალი", დირექტორი საოპერაციო დარგში;

2013-2014 წლები — საქართველოს იუსტიციის სამინისტრო, "აღსრულების ეროვნული ბიურო", რეგიონული ზედამხედველობის სამსახურის მრჩეველი;

2014-2016 წლები — საქართველოს იუსტიციის სამინისტრო, "საქართველოს საკანონმდებლო მაცნე", თავმჯდომარე;

19.09.2016 - 25.12.2016 — საქართველოს იუსტიციის სამინისტრო, "საქართველოს იუსტიციის სასწავლო ცენტრი", დირექტორის მოვალეობის შემსრულებელი;

02.2016 - 12.2016 — საქართველოს იუსტიციის სამინისტრო, "სახელმწიფო სერვისების განვითარების სააგენტო", თავმჯდომარე;

2016-2020 წლები — საქართველოს იუსტიციის მინისტრის მოადგილე;

2018–2021 წლები — საქართველოს იუსტიციის სამინისტრო, "სპეციალური პენიტენციური სამსახური", გენერალური დირექტორი.

მან 2003 წელს დაამთავრა საქართველოს ტექნიკური უნივერსიტეტი, სახელმწიფო მართვის ფაკულტეტი.