საერთაშორისო სავაჭრო პალატის ეროვნული კომიტეტის თავმჯდომარე ფადი ასლი პრემიერ მინისტრს, მამუკა ბახტაძეს ღია წერილით მიმართავს და თიბისი ბანკზე ზეწოლის შეწყვეტისკენ მოუწოდებს. ბიზნესმენი მთავრობის მეთაურს აფრთხილებს, რომ წინააღდეგ შემთხვევაში ქვეყანაში არსებული ბიზნესგარემოს შესახებ შესაბამის ორგანიზაციებს აცნობებს.

"ამას საქართველოში ინვესტირებისა და ქვეყნის რეპუტაციის კუთხით დამანგრეველი შედეგები მოჰყვება; ICC- საქართველო არასდროს მისულა მსგავს უკიდურესობამდე, მაგრამ, ვხედავთ რა განსაკუთრებულ აგრესიას უცხოელი ინვესტორებისა და ადგილობრივი ბიზნესების მიმართ, ჩვენ ვეღარ დავხუჭავთ თვალებს და ვეღარ გავხდებით მოწმენი სხვა უდანაშაულო ბიზნესის შევიწროებისა და ზეწოლის", — წერს ბიზნესმენი.

ასლი ამბობს, რომ ქართული პოლიტიკური კულტურის ნაწილად იქცა ხელისუფლების ცვლილების დროს არასასრუველ ბიზნესზე თავდასხმა. მისი თქმით, 2012 წლამდე ბიზნესზე მრავალი ზეწოლა გადაიტანა და ქართული ოცნების ამომრჩეველი გახდა. მისივე თქმით, ივანიშვილისგან მიიღო დაპირება, რომ რომ ბიზნესი გათავისუფლდებოდა.

"სამწუხაროდ, მისი სიტყვები იმავე დღეს — მზის ჩასვლასთან ერთად გარდაიცვალა, რამეთუ შემდგომ სწორედ იგი გახდა საქართველოში ბიზნესის ნომერ პირველი მჩაგვრელი", — წერს ფადი ასლი და მაგალითად ფილიპ მორისს, ომეგა ჯგუფს, Georgian American Alloys და სხვა კომპანიებს ასახელებს.

ასლის თქმით, იმედი აქვს, რომ ბიძნა ივანიშვილი გააცნობიერებს ვითარების სერიოზულობას და ქვეყნის ინტერესებიდან გამომდინარე შეწყდება ზეწოლა ყველა კომპანიაზე, რაც კარგს გაუღებს უცხოურ ინვესტიციებს.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.