სასამართლოში გამოკითხვის დასრულების შემდეგ საქართველოს ეროვნული ბანკის ყოფილმა პრეზიდენტმა, გიორგი ქადაგიძემ განაცხადა, რომ დამატებითი მტკიცებულებების გარეშე თიბისი ბანკის ტრანზაქციაში ფულის გათეთრების ნიშნების დანახვა ძნელია.

"ამიტომ ვამბობ, რომ ჩვენ გვაქვს ძალიან ეპიზოდური ინფორმაცია", — აღნიშნა ქადაგიძემ.

სასამართლოში გამოკითხვის დასრულების შემდეგ ქადაგიძემ აღნიშნა, რომ პროკურატურის კითხვები ორ საკითხს ეხებოდა: ფინანსური ზედამხედველობის სააგენტოში ხელმძღვანელად მუშაობისას მის ფუქნცია-მოვალეობებს და 2008 წლის 2 სექტემბრის შემოწმების აქტს, რომელის სადაო ტრანზაქციას არ ეხება. მისივე თქმით, დღევანდელი გამოკითხვიდან გამოჩნდა, რომ პროკურატურას რეგულატორთან კითხვები არ აქვს.

"არანაირი სხვა საუბარი ტრანზაქციაზე არ ყოფილა და ვერ იქნებოდა. 2008 წელის 2 სექტემბერს, ოკუპაციიდან სამი კვირის შემდეგ, ჩვენი მთავარი მიზანი იყო ფინანსური სექტორის გადარჩენა, ფინანსური სტაბილურობის უზრუნველყოფა და მეანაბრეების ინტერესების დაცვა", — აღნიშნა ქადაგიძემ.

გარდა ამისა, გიორგი ქადაგიძემ კიდევ ერთხელ თქვა, რომ თიბისი ბანკის საქმეზე საჯაროობა მნიშვნელოვანია:

"არ არსებობს სენსიტიური ინფორმაცია ამ საქმეში, არანაირი კონფიდენციალური ინფორმაცია, არანაირი საბანკო სენტიმენტებზე არსებული ინფორმაცია. ყველაფერი, რასაც შეიძლება, ზიანი მიეყენებინა ბიზნესს ჯგუფისთვის, გაცხადებულია. ახლა ამ მიზეზს ამოფარება ნებისმიერი მხარის მხრიდან, ბანკის მენეჯმენტი იქნება ეს თუ პროკურატურა, არის არასწორ".

გიორგი ქადაგიძე გამოკითხვაზე გუშინ, 6 მარტს დაიბარეს. სებ-ის ყოფილმა პრეზიდენტმა პროკურატურაში გამოკითხვაზე უარი თქვა და მოსამართლის თანდასწრებით გამოკითხვა მოითხოვა.

პროკურატურაში განმარტეს, რომ საქმე ეხება 2008 წელს თიბისი ბანკის საეჭვო ტრანზაქციას, რომელზეც გამოძიებას აწარმოებენ. ამ პერიოდში ქადაგიძე საფინანსო მონიტორინგის განყოფილების ხელმძღვანელი იყო.