ფინანსთა სამინისტროს საგამოძიებო სამსახურის ინფორმაციით, ყალბი საანგარიშსწორებო დოკუმენტების დამზადება-გამოყენების ბრალდებით 8 მეწარმე სუბიექტი პასუხისგებაში მისცეს. მათი განცხადებით, ბრალდებულები გადასახადებისთვის თავის არიდების მიზნით, საქონლის რეალიზაციის პროცესში შესაბამის სასაქონლო ზედნადებებს არ წერდნენ.

უწყების განმარტებით, ბრალდებულები განსახორციელებელი ოპერაციის შესანიღბად შიდა გადაზიდვების ზედნადებს წერდნენ, რომელსაც საქონლის რეალიზაციის შემდეგ აუქმებდნენ.

საქმეზე გამოძიება საქართველოს სისხლის სამართლის კოდექსის 210-ე მუხლის მეორე ნაწილით მიმდინარეობს, რაც ყალბი საკრედიტო ან საანგარიშსწორებო ბარათის დამზადებას, გასაღებას ან გამოყენებას გულისხმობს. დანაშაული სასჯელის სახით ითვალისწინებს თავისუფლების აღკვეთას 4-დან 7-წლამდე ვადით.