თიბისი ბანკის დამფუძნებელი, ბადრი ჯაფარიძე ამბობს, რომ პროკურატურამ საბანკო ოპერაციები შეაფასა, რაც ეროვნული ბანკის კომპეტენციაა.

ბადრი ჯაფარიძეს მიაჩნია, რომ პროკურატურის დღევანდელი განცხადება ეკონომიკური კომიტეტის ჩაშლილ სხდომასთან არის დაკავშირებული. სხდომაზე ეროვნული ბანკის პრეზიდენტისთვისა და თიბისი ბანკის წარმომადგენელბისთვის 26 თებერვალს უნდა მოესმიმნათ.

"მე ვფიქრობ, რომ ასეთი განცხადება ძალიან დიდ ზიანს აყენებს თვითონ ქვეყნის რეპუტაციას. იმიტომ, რომ, ჯერ ერთი, ბრალდება მე იქ არ მომისმენია. იქ ჩამოთვლილი იყო ტრანზაქციები და შეფასებები. ძალიან სანდომიანმა ქალბატონმა გააკეთა შეფასებები წმინდა საბანკო ოპერაციების, რომელიც, ჩემი ღრმა რწმენით, არის ეროვნული ბანკის კომპეტენცია, არანაირად არ შიძლება იყოს პროკურატურის კომპეტენცია. სესხის გაცემის შეფასება, ბალანს გარეთ სესხის გატანა ეს არ არის პროკურატურის კომპეტენცია", — განაცხადა ჯაფარიძემ ჟურნალისტებთან.

გარდა ამისა, ჯაფარიძემ აღნიშნა, სესხი, რომელიც ბანკმა აიღო წარმართული იყო მსოფლიო ბანკის ჯგუფში შემავალ ინსტიტუტში და თიბისი ბანკის კაპიტალში.

"პირად ანგარიშებზე როდესაც სესხულობ კომპანიას, ის ფული უნდა ჩაგერიცხოს პირად ანგარიშზე. საუბარი არის სად წავიდა მერე ეს ფული. სწორედ ამიტომ გვინდოდა კომიტეტზე მოგვეხსენებინა პარლამენტარებისთვის, რომ არანაირი კითხვის ნიშანი არ დარჩეს. საბედნიეროდ ყველაფერი გამჭირვალე გვაქვს. არაფერი დასამალი არ გვაქვს".

დღეს, 28 თებერვალს მთავარ პროკურატურაში თიბისი ბანკის საქმეზე ბრიფინგი გაიმართა. ბრიფინგის შინაარსი თითქმის იდენტური იყო იმ განცხადებების, რომელსაც პროკურატურა ამ დრომდე ავრცელებდა. თუმცა რამდენიმე ახალი დეტალიც გამოიკვეთა. მათ შორის საქმესთან დაკავშირებული პირი აბრევიატურით პ.ღ.

საქართველოს პროკურატურამ გამოძიება დაიწყო 2018 წლის 2 აგვისტოს უკანონო შემოსავლის ლეგალიზაციის ფაქტზე, საქართველოს სისხლის სამართლის კოდექსის 194-ე მუხლის მე-3 ნაწილის "გ" ქვეპუნქტით გათვალისწინებული დანაშაულის ნიშნებით. გამოძიების დაწყებას საფუძვლად დაედო საქართველოს ფინანსური მონიტორინგის სამსახურის მიერ 2018 წლის პირველ აგვისტოს, კანონმდებლობით დადგენილი წესით მოწოდებული წერილობითი ინფორმაცია.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

25 თებერვალს დარგობრივი ეკონომიკის კომიტეტის სხდომაზე თიბისი ბანკის საქმეზე უნდა ემსჯელათ, თუმცა სხდომა საკითხის განხილვის გარეშე დასრულდა. 57 წუთის განმავლობაში დეპუტატები ფორმატზე შესათანხმებლად კამათობდნენ, თუმცა უშედეგოდ. საბოლოოდ, რომან კაკულიამ სხდომა დაასრულა.

გაიგე მეტი: