საქართველოს მთავარ პროკურატურაში თიბისი ბანკის საქმეზე ბრიფინგი გაიმართა. ბრიფინგის შინაარსი თითქმის იდენტური იყო იმ განცხადებების, რომელსაც პროკურატურა ამ დრომდე ავრცელებდა. თუმცა რამდენიმე ახალი დეტალიც გამოიკვეთა. მათ შორის საქმესთან დაკავშირებული პირი აბრევიატურით პ.ღ. საქმის ახალი ფიგურანტი პაატა ღაძაძეა, რომელიც თიბისი ბანკის გენერალური დირექტორის პირველი მოადგილის თანამდებოვას იკავებდა.

საქმის პროკურორის ცნობით, მიუხედავად იმისა, რომ თიბისი ბანკმა შპს სამგორი M-სა და შპს სამგორი ტრეიდზე 2008 წელს გაცემული 17 მილიონის სესხს უიმედო კლასიფიკაცია მიანიჭა, მათ დაკრედიტებას აგრძელებდა და სესხებსაც გასცემდა.

პროკურორის ცნობით, 2012 წელს, თიბისი ბანკმა საერთოდ გაათავისუფლა აღნიშნული კომპანიები ბანკის წინაშე არსებული სასესხო ვალდებულებისგან.

"თიბისი ბანკმა ხაზარაძესთან დაახლოებული ბიზნესმენის კომპანიები, ყოველგვარი სასესხო უზრუნველყოფის გარეშე, ჩაანაცვლა ერთი თვით ადრე ოფშორულ ზონაში რეგისტრირებული კომპანიით, რომელსაც საქართველოში არანაირი ფინანსური აქტივი არ გააჩნდა", — ნათქვამია პროკურატურის განცხადებაში.

უწყების ცნობით, ოფშორში რეგისტრირებულ კომპანიასთან გაფორმდა ხელშეკრულება, რომლის თანახმადაც აღნიშნულმა კომპანიამ, ნაცვლად, სამგორი M-ისა და სამგორი თრეიდისა, აიღო თიბისი ბანკისთვის 17 მილიონის ოდენობის სესხის დაბრუნების ვალდებულება და თავის მხრივ წარმოეშვა ხაზარაძე-ჯაფარიძისგან თანხის მოთხოვნის უფლება.

პროკურატურაში განმარტავენ, რომ ამის პარალელურად თიბისი ბანკმა, გარკვეული პერიოდულობით, იპოთეკისგან გამოათავისუფლა სესხის უზრუნველსაყოფად ჩადებული უძრავი ქონებები.

"საგულისხმოა ის ფაქტი, რომ ოფშორული კომპანიის მინდობილ პირს წარმოადგენდა საქართველოს მოქალაქე პ.ღ, რომელიც სამგორი M-ზე და სამგორი თრეიდ-სესხების გაცემისას იყო თიბისი ბანკის საკრედიტო კომიტეტის წევრი, ხოლო მათი ოფშორში რეგისტრირებული კომპანიით ჩანაცვლებისას იკავებდა თიბისი ბანკის ერთ-ერთ მაღალ მენეჯერულ პოზიციას", — ნათქვამია განცხადებაში.

მათივე ინფორმაციით, ხაზარაძესთან დაახლოებული ბიზნესმენის ხსენებულ კომპანიებსა და ოფშორულ კომპანიას შორის ჩართულ შუამავალ კომპანიასთან მომსახურების გაწევაზე მიღება-ჩაბარების აქტი გაფორმდა 2012 წლის 28 სექტემბერს.

პროკურატურის თქმით, გასათვალისწინებელია ის ფაქტი, რომ შპს სამგორი თრეიდს და შპს სამგორი M-ს სესხები ისე ჩამოეწერა, რომ ამ კომპანიებს სესხის მომსახურებისთვის თანხა საერთოდ არ გადაუხდიათ და აღნიშნული სესხები ბანკს დღემდე არ დაბრუნებია.

"გარდა ამისა, დადგენილია, რომ მამუკა ხაზარაძეს და ბადრი ჯაფარიძეს ასევე არ გაუსტუმრებიათ შპს სამგორი თრეიდისა და შპს სამგორი M - ის წინაშე არსებული სასესხო ვალდებულება", — აცხადებენ პროკურატურაში.

პროკურატურამ თიბისი ბანკის საქმეზე გამოძიების ვერსიის მიხედვით მომზადებული ვიდეოც გამოაქვეყნა:

საქართველოს პროკურატურამ გამოძიება დაიწყო 2018 წლის 2 აგვისტოს უკანონო შემოსავლის ლეგალიზაციის ფაქტზე, საქართველოს სისხლის სამართლის კოდექსის 194-ე მუხლის მე-3 ნაწილის გ ქვეპუნქტით გათვალისწინებული დანაშაულის ნიშნებით. გამოძიების დაწყებას საფუძვლად დაედო საქართველოს ფინანსური მონიტორინგის სამსახურის მიერ 2018 წლის პირველ აგვისტოს, კანონმდებლობით დადგენილი წესით მოწოდებული წერილობითი ინფორმაცია.

გაიგე მეტი: რა ვიცით თიბისის საქმეზე — ყველაფერი მოკლედ